A.L.F.
Èn årtike di Wikipedia.
L' Atlas des Lingaedjes del France, u Atlas linwistike del France, pus conxhu dizo les prumirès letes essegne A.L.F., c' est èn atlasse ki mostere les rcweraredjes so les lingaedjes romans coinreces (lomé pås rcwereus les "patwès") del France. Les kesses di l' A.L.F. fourît atuzlêyes diviè 1895 pa Jules Gilliéron po-z esse dimandêyes so tot li stindêye galo-romande. Dj' ô bén: eto el Walonreye eyet el Swisse romande. Les respondas ont stî fwaits pa Edmond Edmont di 1897 a 1901 dins 639 viyaedjes. Les responses fourît rprezintêyes so des mapes, eplaidêyes di 1902 a 1910.
[candjî] Les viyaedjes del Walonreyes situdyîs a l' A.L.F.
Gn ava 23 viyaedjes del Walonreye situdyîs e l' A.L.F.
[candjî] Rimanance di l' ovraedje des A.L.F.-îs.
C' est l' eplaidaedje des prumîs tomes di l' A.L.F. ki dna l' idêye a l' S.L.L.W. (e 1905) d' atuzler des pus parfondès rcwerances pol Walonreye, et d' askepyî, lontins après (e 1920), des kesses po basti l' Atlasse des Lingaedjes del Walonreye. C' est eto Gillieron k' a scolé Charles Bruneau, et l' enonder po ses rcweraedjes so les Årdenes francesses, et l' Nonne del Walonreye.
[candjî] Djudjmint des linwincieus so l' A.L.F.
Les linwincieus ont trové ki l' A.L.F. n' esteut nén spepieus assez. Insi, tot studiant les dnêyes so ût viyaedjes del Walonreye, et lzès tot rmetant ås responses di l' A.L.W., Lerond, e 1970, a trové 0.83 flotches å mot. C' est paski c' esteut ene seule djin k' a dvou fé tote li bouye. Si n' pleut ele nén cnoxhe tos les lingaedjes k' ele situdyive, di l' occitan d' Gascogne å walon d' Måmdey. Les mapes di l' A.L.F. sont djusse des mots metous ådzeu des ponts de viyaedjes, sins eplikêye ni ratroclaedje po bén vey les stindêyes linwistikes.
