Aessi

Èn årtike di Wikipedia.

Èn Achi, c 'est, su les vîs tchårs et les viyès tchèrètes, on fwârt fiêr ki supwate lu chassis su s' mitan,ki finit d' tchèke costé pa ène fizêye, èyusse ku les ruwes du bwès tournat. Les ruwes avint in pô d' djeu su les fuzéyes, pou diminouwer k' frotmint d'in fiêr su l'ôte. On n' counichot nin co les buzleures. Gn' avot don ku les ruwes ki tournint, nin l' achi.

Can l' trin è arivé, coume çut-ci roulot su des rails mètus à ècartumint bin défini, l' achi et les deus ruwes n'ont pus fé k' ène seule pîce. L' achi dèpassot des deus costés des ruwes et tournot don avu zèles; ces dbouts-la astint raclôs dins ène bwèsse ki, du minme côp, supwartot lu tchassis du wagon. Ces bwèsses-la racloyint les dbouts dl' achi, ki tournint su in moyû solidêre dul bwèsse. Ene buslure d'in mètal pus tinre s' intercalot atère la ruwe et l' moyû, pouz aspêtchî lu frotadje du fiêr su fiêr. La bwèsse ére plin.ne du spèsse ôle, ki bagnot dins dl' ètoupe, pouz achûrer le grêssadje du moyû.

Il arivot adon ku, pou ène rêzon û l' ôte, ène bwèsse du wagon tchåfe et cumince à griper, avu toutes les consèkances ku ça put amon.ner. ( feu ou trin, pètadje du l' achi, etc) Cand in trin passot dins ène gare, i falot ène oume sul kai, pou wêtî passer l' trin et averti la gare chûvante, s'il avot rmarké ène bwèsse tchåfante. Çu gare-la rutnont l'trin ; on garot l'wagon sul costé et lu landmwin, ène èkipe spéciale vunot rèparer la bwèsse.

Asteure, les bwèsses du wagon sont toudi la, mês les roulmints ont pris l' place des buslûres.