Motî:banåve
Èn årtike di Wikipedia.
banåve
I. [addj.]
1. (lwè) da tertos, wice ki les djins polèt aler tertos, tot sujhant sacwantès rîles. On banåve for; on banåve molén, on banåve bwès, ene banåve voye. Après l' awousse, les waides sont sovint banåves; l' aforesse n' est pus banåve tins del tchesse. rl a: comon. F. banal, public, communal. >> On banåve torea: gayet metou dins on viyaedje, po les ptitès djins î aler fé potchî leus vatches. F. taureau de monte.
2. (istwere) nén sårté, tot cåzant d' ene trîxhe. F. en friche.
3. (pa stindaedje) abandné, êye; leyî, leyeye hatche et matche (po ene måjhon, evnd). Li tere del Walonreye est ele divnowe banåve ? (I. Steinweg). F. abandonné, à l'abandon. >> leyî banåve: leyî la, sins î rwaitî. I leyèt leu måjhone banåve po-z aler vijhner (ramexhné pa J. Haust). >> tot est banåve: cwand on mousse en ene måjhon, po dire k' i gn a nolu, k' on mousse come on vout. Franwal: ahåyant po: on entre comme dans un moulin. >> roter avou ses bresses banåves: avou les bresses ki pindèt berlike berloke. F. bras ballants.
4. k' on n' aconte nén, k' on leye tot seu en ene coine. C' est des efants banåves, i n' toûnront nén bén. rl a: disseulé. F. délaissé, isolé, esseulé. >> on tchén banåve: sins mwaisse. F. chien errant.
5. poenneus(e), sins alant, disbåtchî (eye). Dispu ki s' feme est moite, il est tot banåve. Li disparicion di nos fels soçons X et Y nos leye tot banåves eyet leyrè on fameus vude dins nosse binde (E. Taquet). El cinsî avou s' fotche frontåle, i mene tote banåve, va kerdjî des gros ronds boteas Po les dner ås vatches ey ås veas...Todi fé tot a rascaré; Jamwais fini, jamwais rpoizé, Jamwais binåjhe, jamwais contin, El mawe banåve Avå l' eståve (G. Spirito). On s' riwaite tot banåve, gn a bén des cis ki låtchnut ene couyonåde, n' espaitche k' on a l' pepete (H. Petrez). rl a: dizôrné, reyusse. F. triste, abattu(e), affligé(e), décontenancé(e), déconcerté(e), désemparé(e), désorienté(e).
6. sins rén a-z î rilver. On banåve djoû. F. banal, ordinaire.
II. [adv.]
1. feneyanmint. I dmore todi banåve å cwén di s' feu. F. oisivement.
2. sins sawè edou. endaler banåve. F. à l'aventure.
3. sins k' on polaxhe comprinde. divizer banåve. F. délirer. 4. catchiveuzmint; ponre banåve. rl a: ponre pierdou. F. pondre dans un endroit caché.
Disfondowes: banaule, banauve, banâve, banau, banâl, balâne, balaune, bayâne. Coinrece Payis d' Tchålerwè.
Etimolodjeye: bodje "ban", cawete "-åve" forcoridjeye di "-åle" metou po "-ål".
