Coutcouloudjoû (gazete)
Èn årtike di Wikipedia.
Coutcouloudjoû (k' on rascourtixhe voltî li Cout´ ), c' est ene pitite gazete tot e walon ki rexhe tos les troes moes.
Divant, ele moussive foû tos les moes, pu tos les deus moes.
Coutcouloudjoû c' est l' mot-brut do cok e walon, et ç' a stî rprins come tite del gazete del Soce des Rcåzeus d' Walon, metowe so pî pa Lucyin Mahin e 1996 a Transene, et k' a fwait dijh ans å lon ses raploûs a Bietris, poy a Bive.
Bén kel gazete seuxhe ricnoxhowe pal Cominålté Walonreye-Brussele, ki lyi alowe kékès çanses tos ls ans, li Cout' a todi dmoré indepindant et foû del politike.
Si mwaisse såme, c' est di spåde li walon et mostrer åzès djins ki c' est on vicant lingaedje, ki pout cåzer di ttafwait, et di bouter po dner å walon, avou l' gåmès et l' picård dins leus cwéns, li plaece ki lzî rvént el Walonreye.
Li Cout´, come on dit, est scrît tot e walon, e wårdant l' manire di scrîre et les åbitudes di tchaeconk.
C' est ene gazete sins mirlifitche, ki rexhe so cogne A6 (ene dimeye pådje A4). Elle est imprimêye pa fotocopiaedje, et raloyeye d' ene agrape å mitan. Li emantchaedje eyet l' fotocompôzaedje sont fwaits pa Pire Otjacques eyet Louwis Baidjot. C' est l' Louwis ki monte li gazete, eyet l' evoyî. Li Cout´ est saetchî a 150 egzimplaires.
Ådvins |
[candjî] Tecses eplaidîs dins l' Cout´
Å rvier di bråmint des rvowes e walon, Coutcoulondjoû eplaide totès sôres di tecses, ossu bén les belès letes ki del prôze nén racontrece. Mins gn a bråmint dipus d' prôze ki d' powezeye (li contråve di des rvowes come "El Bourdon" u "La Wallonne", metans.
Dins les scrijhaedjes a môde di gazete, on cåze ostant d' actouwålité, flåwes ki di syince u d' foclore u d' istwere
Dins les belès letes, gn a des ledjindes, des contes, et, come di djusse, sacwants powinmes.
Gn a ossu, di tinzintins, des tecses rilidjeus, come des priyires.
Tenawete, gn a do diccionairaedje, des spots, des lçon d' croejhete walone.
Gn a eto ene coirnêye avou les noveles, aprume les teyåtes el Province do Lussimbork, les lives e walon, et on prezintaedje e walon di kékes ôtes gazetes e walon.
[candjî] Sacwants grands scrijheus do Cout´
- Arthur Schmitz : sicrît di l' actouwålité, et des sovnances do vî tins. Pacô des viyès tchansons.
- Emile Petcheur î eplaide ses noveas tecses, a môde di gaztî, des arimeas.
- Gaston Lucy : li seul grand scrijheu do payis la kel Cout´ a skepyî. On replaide voltî di ses tecses.
- L'Cout' n' èst nén nâreu èt wazu riprinde dès tècses foû d' Rabulèts !
[candjî] Istwere del gazete
Li l° 1, c' est 4 pådje A4, ki rprindèt des tecses et des sayes da Lucyin Mahin, emey zeles, pol Rantoele. I mousse foû e moes d' awousse 1995. L' ekipe di redaccion, Pierre Otjacques et Louis Baijot, est ddja la. On-z anonce li prumî raploû del Soce des rcåzeus d' walon a Bietris, ki serè li screne del rivowe.
