José Schoovaerts
Èn årtike di Wikipedia.
José Schoovaerts (e walon, Djozé) a vnou å monde e 1936 a Åjhô.
Dispu diviè 2000, il a scrît des tecses so totes sôres di sudjets e walon. Des ratournaedjes di Belès letes, di paskeyes erotikes, evnd.
Ses tecses n' ont waire sitî cossemés so papî : seulmint sacwants dins l' Rantoele gazete u co Coutcouloudjoû, eyet des bindes d' imådjes, come L' Avespré.
Il a purade sitî eplaidî, et s' publiyî lu-minme so cogne informatike, sol Daegntoele, dins s' gazete Rabulets eyet des ptitès sayetes di romans eplaidîs so les fyis.
Di s' mestî, il esteut dessineu et spiroutî. Eto, i gåyote todi les pådjes di ses Rabulets avou des dessins et des binddimådjes. Il a eto manké d'eplaidî so papî l' binddimådje, "So l' Avespré".
Il a adjinçné les dessins del coviete del Rantoele gazete, di 2003 à 2005, tins k' i nd esteut l' adjinçneu. Il a rprins l' gorea e 2007.
[candjî] Corwaitaedje do walon et do stîle da J. Schoovaerts
Djozé eploye on walon ki comaxhe les mots di totes les coines del Walonreye, et avou on cmaxhî sistinme di scrijhaedje, çou k' i rvindike bén hôt dins s' gazete "Rabulèts"
- "I n' vos fåt nén ewaerer, on (= dji) comele et maxhe todi les modêyes di scrijhaedje".
Dins ses tecses, li Djozé djowe avou les mots, avou leus sins et leus cognes. I screye eto voltî so des sudjets erotikes ou d' actouwålité. I n' est nén nareus do dire li sinne so les soces waloneuses. Sins peu d' hagnî, i scrît des sacwès ki sketnut l' cåde des djermêyes di scrijheus e walon di dvant, et les tabous des pezants ki djouwnut les "mwaisses moenneus spepieus coridjeus".
[candjî] Dierins ovraedjes
I voleut ovrer po ene sacwè et finixha pa-z awè s' sô d' bouter po ene sakî.
Mins po n' nén disparexhe à todi, e moes d' djulete 2006, il a renondé RABULèTS. I l' edåma pa ene novele binde d' imådjes ("Et l' niût s'a stindou") k' on-z î pout, avou ene miete di boune volté, ricnoxhe å ddins ene pougneye di djins del Walonreye d' adon.
Bén seur, cisse novele saye la, tot come les cenes di dvant, a rade plonkî dins l' ombe et n' lyi rapoirter k' des mizeres di responses. Mågré tot, sins pont d' ecoraedjemint, i s' a co rdåré dins ses papîs et redåmer e moes d' setimbe 2006 ene shûte lomêye "L' Avesprêye tcheyowe, i fwait tot noer".
Fén 2006, i toirtchêye deus bindes d' imådjes so des tecses da Nietsche; "El novele idole" eyet "Li moirt k' est volontaire" èt ène rimuwante pitite sucète à l' après d' Choderlos d' Laclos "Tchåderlote".
È 2007, i s'a plonké dins on ovraedje di tos lès diâles : fé bodjî lès imâdjes di Noersipène ! Djanvî a fini k' il avéve "dèdjà" mètu 54 moyatès sicondes dins l' bwèsse. Kand on sondje k'i faut 24 imâdjes po ène siconde di fime, on s' rind conte k'ça dmande do tins po divnu Walt Disney.
[candjî] Hårdêyes difoûtrinnes
- Pådje moennrece des scrijhaedjes da Djozé Schoovaerts so l' Aberteke (e rfondou)
- Årtchives del gazete éndjolike "Rabulets" (walon melkin)
- Binde d' imådjes "L' avesprêye" (e rfondou)
- Li binde d' imådjes "Et l' niût s' a stindou" (walon melkin)
- Li binde d' imådjes "L' avesprêye tcheyowe, i fwait to noer" (walon melkin)
- El novele idole (walon melkin)
- Li moirt k' est volontaire (walon melkin)
- Waibe 2007
