Jaime C. de Veyra
Tikang ha Wikipedia
Hi Jaime Carlos de Veyra (Nobyembre 4, 1873 - Marso 7, 1963) usa nga Waraynon nga politiko, manunurat, ngan tawo hin estado. Natawo hiya ha Tanauan, Leyte. Naggradwar hiya hin kolehiyo tikang han Kolehiyo han San Juan de Letran ha Manila han 1893. Nag-aram hiya hin balaod, pilosopiya ngan mga surat ha Unibersidad han Santo Tomas ha Manila tikang han 1985 tubtob 1897.
Nagsirbe anay hiya nga sekretarya han Gobernador Militar han Leyte tikang han 1898 hangtod 1899 ngan nagtrabaho gihapon hiya ha periodiko. Api hiya han konseho munisipal han Sugbo. Han 1906 nagin Gobernador han Leyte hangtod 1907. Han 1970 napili hiya nga miyembro han Pilipinhon nga Kamara han mga Representante ngan nagsirbe hiya hangtod han 1909.
Api hiya han Philippine Commission o Komisyon Pilipinhon tikang han 1913 hangtdo 1916. Han mga sumunod nga tuig, nahimo hiya nga ehekutibo nga sekretarya han Pilipinas. Han 1917, napili hiya komo miyembro han Partido Nacionalista nga Residente nga Komisyonero (Resident Commissioner) ha Estados Unidos. Naotro hiya ka elihir han 1920 ha amo la gihap nga puwesto. An ngatanan nga tuig nga nagsirbe hiya nga Residente nga Komisyonero tikang han Marso 4, 1917 tubtob Marso 3, 1923. Waray na hiya sinmugot nga magin kandidato katapos hini ngan binmalik hiya hin trabaho komo periodista. Han 1925 nahimo hiya nga nangungulo han departamento han Espanyol han Unibersidad han Pilipinas ha Manila, nga diin hiya nagsirbe hangtod han 1936.
Ginhimo hiya nga direktor han Instituto han Nasodnon nga Yinaknan. Komo direktor hini, upod hiya han paghimo han Tinag-alog nga amo an magigin nasodnon nga yinaknan. Nagsirbe hiya nga direktor hangtod han tuig 1944. Katapos hini, nagsirbe hiya nga researcher hin kasaysayan hin pagdumara han mga manuskrito ngan mga ginmatalaan ha Nasodnon nga Biblioteka; nagsirbe gihapon hiya nga researcher hin kasaysayan han Opisina han Presidente.
Namatay hiya ha Manila han Marso 7, 1963 ngan ginlubong hiya ha Sementeryo han La Loma.