江淮官话
来自 吴语维基百科
江淮官话末，是官话里向个一种，也叫下江官话。
内容 |
[编辑] 分布
江淮官话主要分布来江苏安徽两省个长江搭淮河之间，故而得名。
江淮官话来江苏搭仔安徽个南海也有分布，江苏南部个南京搭镇江虽然乡下还有讲吴语个，城区侪是讲江淮官话个。安徽南部除脱徽州本生侪主要是讲吴语个，太平天国运动之后，土著死到七零八落，外地移民人数浪超过本地人，里向又以安徽江北个移民为多，个了该歇城市里向多数是讲江淮官话个；土著吴语主要只来拉有星乡下头讲，而且还来浪慢慢教拨江淮官话取代。
[编辑] 特点
江淮官话来拉官话里向个突出特点主要是还保留中古汉语个入声，形式浪是以喉塞音结尾个短元音，个末一般性典型个江淮官话有阴平、阳平、上、去、入五个声调。再一个典型个江淮官话个韵母有单化个趋势，咸山摄也经常性发成鼻化音。
对于讲吴语个人来讲，江淮官话个另外一只交关突出个腔调浪个特点就是俚个阴平多数读低降调。
[编辑] 代表
江淮官话一起先是南京话代表个，该歇蛮多人拿扬州话作为俚个代表。南京官话也是南派官话系统个代表。
[编辑] 分片
一般性该歇拿江淮官话分成功三片：洪巢片、通泰片搭黄孝片。
洪巢片是相对典型个江淮官话。声调只有5个，比普通闲话多一只入声。古全浊声母个分化搭普通闲话一样，即“平送仄不送”。
通泰片一般性拨拉认为是江淮官话里向吴语底层顶顶丰富个一片，也好看成是吴语搭典型个江淮官话个过渡闲话，有交关多搭吴语个共同词汇。俚一般性有6-7个声调，古全浊声母一律读送气音，搭客家话搭赣语一样。
黄孝片该歇有交关多人勿认为是江淮官话。俚分布来湖北省，主要特点是入声读长调，勿读一般江淮官话个喉塞音，因为有入声，所以就拨拉归到江淮官话里向。有星人认为俚实骨子是西南官话个原始形态，间接个证据是有讲武汉闲话个入声一径到民国初年再无拨个。
[编辑] 参考
[编辑] 外部链接
Categories: 江淮官话 | 官话
