Christophorus Clavius
Us der alemannische Wikipedia, der freie Dialäkt-Enzyklopedy
 |
Dialäkt: Markgräflerisch (Ebringe) |
Christophorus Clavius, (25. März 1538 – 12. Februar 1612) isch e dytsche Jesuit Mathematiker un Astronom gsi. Er isch dr Hauptarchitekt vum gregorianische Kalender. In sine ledschde Läbensjohre isch er dr am meiste respektiert Astronom in Europa gsi.
Yber si Jugend isch nit viil meh wie si Burtsstadt Bamberg bechannt. S'Burtsjohr isch wohrschinlich 1538, chännt aber ufgrund vu domols underschidliche ghandhabte Johrafäng au 1537 gsi si.
Au nit yberlieferet isch si bürgerlicher Namme, wo in dr domolige Tradition latinisiert worre isch. Mer goht entweder vu Christoph Klau us, sofern dr Familienamme bloss ins Latinisch transkribiert worre isch, oder aber vu Schlüssel im Fall vu ere Lähnsybersetzig. (lat. clavis fer dytsch Schlüssel)
Clavius isch 1555 Jesuit worre un het an dr Universität Coimbra in Portugal studiert, wo dr domols berüehmt Mathematiker Pedro Nunes si Lehrer worre isch. Denooch het er am Jesuitekolleg in Rom Theologi studiert un isch dert nooch em Studium fer dr Rest vu sinem Läbe Mathematik-Dozent worre.
1579 isch er vu Papst Gregor XIII mit dr Kalenderreform beuftragt worre, wo no 1582 in dr katholische Länder in Kraft trätte isch un hüt weltwitt giltet.
Als Astronom isch Clavius e Ahänger vum geozentrische Weltbild gsi un het s'heliozentrisch Modell vum Kopernikus abglähnt, obwohl er d'Probleme vum geozentrische Modell aerchennt het.
Galileo Galilei het ihn bi sinem Bsuech 1611 mit großem Respekt behandelet, Clavius wiiderum het d'Entdeckige vum Galilei akzeptiert, allerdings d'Echtheit vu Krater un Berge uffem Mo azwifelet. Insofern isch es e chleini Ironi, dass e große Mondkrater uf dr Namme Clavius daift isch.
[ändere] Quelle
- James M. Lattis, Between Copernicus and Galileo: Christoph Clavius and the collapse of Ptolemaic cosmology (University of Chicago Press, 1994).
[ändere] Externi Site
- The Galileo Project — Biographi vu Christophorus Clavius.
- Opera Mathematica — Die vollständige mathematische Wercher vu Christoph Clavius.
