Eichener See

Us der alemannische Wikipedia, der freie Dialäkt-Enzyklopedy

De Eiemer See isch ä Karschtsee ufem Dinkelberg bi Schopfe in Bade-Württeberg. S'Bsundere isch, dass er nur alli paar Johr mol züm seh isch. S'Git kei Bach, wos Wasser ine oder devo laufe chönnt, sundern er würd unterirdisch vom Grundwasser gfüllt. Deswege isch er nur dusse, wenns vorher arg lang grägnet het.

de Eiemer See

[ändere] Geologie

De Dinkelberg isch ä Karschdgegend, un es het überall Höhlene, Löcher un Ibrüch. Wänns rägnet, sammlet sich in dene s'Wasser, un wänns über ä längeri Zit rägnet un grad no dSchneeschmelzi dezü chunnt, no cha nit alles Wasser ablaufe un staut sich langsam in dene Hohlräum uf, bis es sich inere Senke, ä Doline, sammlet. Me cha grad züelüege, wie sWasser ussem Bode usesprudelt. In Versüch mit Farb het mer nochgwiese, dass des Wasser, wo im See isch, bim ablaufe unter anderem in de Hasler Höhli zHasel (Baden) züm Vorschin chunt, es also ä Verbindig zwüsche em See un de Höhli git, wo unterirdisch verlauft. D'Hasler Höhli isch aber öbe 2 Kilometer vom See furt.

[ändere] Allgmeins

Wenn de Eiemer See ganz gfüllt isch, isch er öbe 3 Meter 20 tief, 250 Meter lang un 135 Meter breit. Dodemit gön öbe 33 Duusig Kubikmeter Wasser gri. Wenns arg schnell goht, isch er innerhalb vo nere Wuche gfüllt. Dusebliebe düt er meischdens zwüsche drei Wuche un 2 Monet, shets au scho geh, daß er zügfrohre isch un mer het chönne Schlittschühlaufe.

[ändere] Urzytchräbs

Im Eiemer See gits ä urzytliche Chräbsart, wos suscht niene in Europa git. Uf latinisch heißt er Tanymastix lacunae un ghört zü de Chiemefieschräbs (also ä Chräbs, wo dChieme an de Fies oder an de Bei het). Er würd öbe zwei Zäntimeter lang, wenn er usgwagse isch, un dWiebly chönne bis zü vierzähduusig Eier lege. Sälli Eier sin arg robuscht un chönne mehreri Johr im trochene Bode überläbe, bis de See wieder emol use chunnt.