Benus adormita
De Biquipedia
|
||||
|---|---|---|---|---|
 |
||||
| Cuatrón informatibo | ||||
| Pintor | Giorgione | |||
| Año | 1501 (?) | |||
| Estilo artistico | Renaixentista | |||
| Tecnica pictorica | Olio sopre lienzo | |||
| Dimensions | 108,5 x 175 cm | |||
| Localizazión | Gemäldegalerie Alte Meister (Galería de Pinturas de Biellos Mayestros) Dresden, Alemaña |
|||
 Esta fuella ye escrita en belsetán. |
La Benus adormita, tammién connoixita como la Benus de Dresden, ye una pintura del·l'artista benezián renaixentista Giorgione, feta enta 1501, e que influiría muto en pinturas posteriors. A día de güe se troba esposata enna Gemäldegalerie Alte Meister (Galería de Pinturas de Biellos Mayestros) de Dresden (Alemaña).
Enna pintura, una del·las zagueras obras de Giorgione, se bei una muller despullata con un perfil que pareix siguir el des tozals del fondo. El pintor troballó con gran detalle l'orizón e'l·las suyas brempas. La testura del·las telas, a on que chaze plazidamén la diosa e'l·l'armonioso e bucolico paisache, atorga a este cuadro un chusto equilibrio entre calma e sensualidat. En eslechir de pintar una muller despullata, Giorgione marcaba una reboluzión enna estoria del·l'arte; actualmén ye considerato per bels criticos un des iniciadors del·l'arte muderno.
Al·la suya muerte, la pintura no yera encara rematata. El zielo el remataría més tarde Tiziano. (Tiziano tammién pintaría dispués una altra Benus, encara que no produziría es mismos efeutos que'l·la de Giorgione.)
Enna obra i subchazen cualques implicazions eroticas enno brazo debantato de Benus (estando la esposizión del debaixo-del-brazo un simbolo de secsualidat) e enna colocazión del·la man zurda enna enforcatura. Las telas son pintatas de plata, una color freda que contrasta connas tonalidaz més caliens usatas tas lins, e pareixen richidas, a diferienzia des de pinturas similars fetas per Tiziano u Velázquez. El paisache imita las curbas del cuerpo del·la muller, cosa que ye relazionata conno feto de tornar el·la figura umana tal·la conzepzión d'ocheuto organico e natural.
L'actitut contemplatiba ental·la natura e la belleza del·la figura son caracteristicas tipicas de Giorgione. La composizión d'esta pintura influyó claramén en Tiziano, e més tarde en pintors como Ingres u Rubens.
