Día d'os santos inozens
De Biquipedia
Lo día d'os santos inozens, lo 28 d'abiento, ye tradizional de zelebrar-lo á Aragón, per tota España e á muitos países ispanoamericans, fendo bromas á familiars e á amigos. Ye parexito á lo Fool's Day (Día d'os Fatos) d'a cultura anglosacsona e á lo Poisson d'avril (Pex d'abril) franzés, que se zelebran, manimenos, lo 1 d'abril.
Es oríchens d'o día d'os santos inozens s'asolan sobre una tradizión relichiosa d'o cristianismo e retaculan ta la matazía de toz es ninons menors de 2 años que, seguntes la Biblia, mandó fer Erodes á Belén con razón d'o naximiento de Chesús de Nazaret.
Güe, per contra, se relaziona con as antigas tradizions burlescas de redir-se-ne d'a chen, fendo brometas á familiars, compañers de fayena, amigos, etz., que se tornan asinas las suyas bictimas inozens. Bromas tradizionals como la de pinchar un moñaquet de papel n'a espalda d'a chen ban dixando paso ta belaltras de més actuals, como las que se fan per meyo de mensaches eletronicos u d'a telefonía móbil.
Á los meyos de comunicazión tamién se gosa de fer cualque chanza u d'alterar-ne lo contenito de trazas que bela informazión parixca reyal, prebenindo-ne u informando-ne dimpuesas.
