Nomenclatura binominal
De Biquipedia
En biolochía, ra nomenclatura binominal (también clamada erroniamén binomial, están iste zaguer uno conzeuto unicamén matematico) ye uno combenio estándar empregau tá denominar espezies. como ra parabla binominal suguesta, ro nome zentifico d'as espezies yé una combinazion de dos parablas ("nomes") en latín: ro nome d'o chenero e uno epiteto o nome espezifico. Ra chunión d'ambos bocables yé ro nome d'a espezie.
Ro nome d'o chenero puede ser perfeutamén compartíu por dos espezies chirmanas (Homo sapiens e Homo neanderthalensis son espezies d'o mesmo chenero) pero ra cosa que desiña propiamén l'espezie ye ra combinazión d'ambas parablas (ro nome d'a nuestra espezie yé Homo sapiens, no pas sapiens)
Ro nome chenerico siempre yé menester que lebe ra primera letra á mayuscula, á mientes que l'epiteto espezifico no l'eba de lebar pas. ista norma encludiye l'obligazión de resaltar ro nome, ro cuo á manuscritos e textos mecanografiaus fa-s'ie subralland-lo, e á testos d'imprenta por meyo d'a corsiba. Por exemplo: Homo sapiens, encara que también poderba-se fer con negreta: Homo sapiens, mas no yé tan frecuénd.
Ro nome d'o chenero poderba-se abreuchar empregánd l'inizial si ista coencidixe con ro zaguer chenero mentau con ra mesma inizial, e siempre aintro d'a mesma pachina, pero no deberba d'usar-se si ista abreyatura puede conduzir ta confusions. A bels poquets casos l'abreyatura yé común, como á ro caso d'a bauteria Escherichia coli, qui gosa-se á denominar E. coli á ra literatura medica e d'autros grupos profesionals foranios t'a biolochía.
Ra nomenclatura binominal ye ra forma más espezifica aplicada ent'a denominazión d'espezies, pero representa nomás uno d'os bels estandars d'a nomenclatura biolochica, qui s'ocupa también d'a denominazión formal á latín d'os taxons de categoría superior.
