Simonetta Vespucci
De Biquipedia
Simonetta Cattaneo Vespucci (1453 – 27 d'abril de 1476) estió l'amán de Chulián de Medici, lo chirmán més choben de Lorién o Magnifico. Considerata la muller més beroya de lo suyo tiempo, fizió de modelo ta la conoxita obra de Sandro Botticelli O naximiento de Benus, asinas como ta cualques altras de las suyas pinturas.
Estió tammién modelo ta dos obras de Piero di Cosimo: lo Retrato de Simonetta Vespucci, an que aparix como Cleopatra con un áspid á lo redol de lo cuello, e la Muerte de Procris. Tammién se pintoron muitas altras telas e s'escribioron buena cosa de poemas en onor d'ella.
Naxió como Simonetta Cattaneo en 1453. O lugar de lo suyo naximiento ye controbertito; beluns aseguran que estió á Portovenere, an que eba á naxer la diosa Benus, mientres que altros dizen que á Chenoba. Con quinze años casó con Marco Vespucci, primo aluñato de lo conoxito esplorador florentín Amerigo Vespucci. Per meyo de la familia Vespucci la descubrioron Botticelli e altros pintors destacatos plegatos en Florenzia. No pasó guaire que tota la nobleza de la ziudat quedás embazilata per ella, mesmo los chirmans Lorién e Chulián de la poderosa familia Medici. Lorién s'encargaba d'afers d'estato, pero lo suyo chirmán yera libre ta festexar-la. En 1475, á lo torneyo de chustas de La Giostra, Chulián entró en as listas portando un siñal con una imachen de Simonetta, pintata per Botticelli, baxo la cual se leyeba una inscripzión en franzés, La Sans Pareille "La inacomparable". Ganó Chulián lo torneyo e l'afeuto de "La bella Simonetta", como li'n diziban, que estió clamata "Reina de la Belleza" d'ixa competizión. Es dos se fizon amans.
Desgraziatamén, només que un año dimpués moriba Simonetta, lo 26 d'abril de 1476, per una tuberculosi polmonar. Teneba 22 años. Botticelli remató lo suyo Naximiento de Benus ta 1485, nueu añatas més tardi. Es doctors que han esaminato los didos licheramén deformatos e los clabillars inflatos de la muller de la pintura creyen que patiba d'artritis reumatoide.
Trenta e cuatre años dimpués de la suya muerte, Botticelli demandó d'estar enterrato á los piez d'ella.
