Catedral d'Uviéu
De Uiquipedia
La catedral d'Uviéu ye una catedral d'estilu góticu que s'alcuentra na ciudad d'Uviéu. Ye conocida tamién como sancta ovetensis, refiriéndose a la calidá y bayura reliquies que contien. Ta consagrada a San Salvador.
[editar] Hestoria
El rei Fruela I d'Asturies (del 757 al 768), mandó construyir una ilesia nel tarrén u güei s'asitia l'actual catedral. La ilesia consagróse a San Salvador.
Alfonso II el Casto, rei d'Asturies (del 791 al 842), fíu del anterior, al treslladar la capital del reinu a Uviéu, mandó edificar tou un conxuntu ediliciu nos mesmos terrenos, aprovechando dellos espacios de l'antigua ilesia de San Salvador. Nes escavaciones feches nel añu 1940 asoleyáronse dellos restos que dieron fe, xuntu colos documentos escritos, de la esistencia d'aquellos edificios. De la dómina d'Alfonso II queden anguaño:
- La capiella palatina (que güei se conoz como Cámara Santa).
- La torre de San Miguel, que foi'l campanariu de la ilesia.
Les vinientes construcciones y anovaciones foron nel sieglu XII. Sábese documental y arqueolóxicamente qu'esistió una catedral románica col so claustru. Tamién d'esta dómina aportaron restos fasta los nuesos díes:
- El caberu cuerpu de la Torre Vieya.
- Les bóvedes de la nomada Cámara Santa.
- Les escultures d'esta cámara que formen un Apostoláu de gran valir artísticu.
Nel sieglu XIII hebo otru anovamientu. Les obres emprimáronse pola Sala Capitular y siguieron pol claustru. El templu escomenzóse a fines del sieglu XIV y nel sieglu XVI fínase'l pórticu y la torre de la fachada. Ye lo que podemos contemplar de la catedral actual. Nos sieglos vinientes ficieronse obres y ameyoramientos en munches de les capielles.
[editar] Cultura popular
Esiste una cuarteta sobre la Catedral en referencia al Camín de Santiagu que diz:
-
- El que va a Santiago
- y nun va al Salvador
- visita al criáu
- y dexa al Señor.
