Gaiteru Libardón
De Uiquipedia
Ramón García Tuero (1864 - 1932), conocíu como'l gaiteru Libardón fue un gaiteru y cantador asturianu de gran popularidá. Fixo xires per Europa y América, participó en varies esposiciones universales y grabó'l primer discu de gaita asturiana .
Ramón García Tuero Nació en Molín del Matu (Arroes – Villaviciosa) el 6 de febreru de 1864. L'alcuñu de Gaiteru Libardón col que ye conocíu vien–y del nome castellanizáu del pueblu de Lliberdón, del que yera la so muyer, María Caravera, y onde fue a vivir tres casar con ella en 1890.
García Tuero solía actuar solu o acompañáu al tambor, les más de les veces por José García, conocíu como'l Tambor de l'Abadía. Tenía la peculiaridá de tocar la gaita y cantar a la vez, improvisando munches veces los cantares.
Anque yá yera conocíu como músicu nes romeríes, algamó la fama a los 25 años, cuando en 1889 representó a la empresa de sidra El Horreo, de Colunga, na Esposición Mundial de París d'esi mesmu añu y participó depués n'otres como les de 1900 na mesma ciudá de París, en Buenos Aires (1911) o Barcelona y Sevilla (1929).
Prueba del so ésitu son tamién les xires que tien fecho per Europa y América, les numberoses condecoraciones españoles y estranxeres que recibió y el tratu que llegó a tener col rei Alfonso XIII o con Miguel Primo de Rivera.
Nuna época na que la industria fonográfica taba nos entamos, fue un artista pioneru y grabó'l primer discu de gaita asturiana en 1909. Dos años más tarde firmó un contratu en Milán por diez años pol que se comprometía a grabar cuarenta cantares.
García Tuero morrió en Lliberdón el 21 d'ochobre de 1932.
El 10 d'agostu de 1969 rindióse-y un homenax en so casa de La Quintana, que tovía se pue visitar anguaño y na que se guarden parte de los instrumentos y ropa qu'usó nes sos actuaciones.
En 1986 el gobiernu del Principáu editó un discu con una seleición de los sos temes más populares.
