Skama la Rede

De Uiquipedia

Skama la Rede ye un grupu asturianu de ska-punk formáu en setiembre de 2003. La mayoría de los sos componentes vienen de la villa de Candás, anque tamién hai un lluanquín y un llionés.

Tabla de conteníos

1 Hestoria
2 Componentes
3 Discografía
4 Enllaces esternos

[editar] Hestoria

El grupu foi formáu al traviés de los contautos ente varios músicos de la fastera costera central asturiana, munchos d'ellos nin siquier conociéndose personalmente, col enfotu de formar un grupu de bases ska con influyencies rock, punk y folk (y de grupos como Dixebra), emplegando la trompeta y la gaita asturiana nos sos temes. Tamién deciden emplegar esclusivamente l'asturianu como llingua d'espresión, participando ansí na vindicación llingüística del pais.

El nome de la banda vien d'una anéudota asocedida demientres les fiestes de Candás de 2000, cuando un parroquianu apaeció en metanes de la folixa "canciando" enfiláu'l tema Smoke on the water de Deep Purple, pero camudando la lletra por Escama la rede, espresión de los conceyos mariñanes del centru d'Asturies que se refier a l'aición de robar los pexes de la rede d'otru piescador. Al velu, dellos de los que depués compondríen Skama la Rede comentaron, ensin mayores pretensiones, qu'aquel sedría un bon nome pa un grupu de ska.

El grupu debuta de forma "oficial" el 27 de febreru de 2004 en Candás, nún conciertu de baldre xunta otres trés bandes de la fastera. En primavera del mesmu añu editen la so primera maqueta, Hestories absurdes, qu'incluyiría cinco cantares. Finen l'añu con al rodiu d'una ventena conciertos a lo llargu la xeografía asturiano, con una escapada a Llión. N'ochobre teloneen a Skalariak na Sala Albéniz de Xixón.

2005 sedría un añu de consolidación pa Skama la Rede dientro del panorama musical asturiano, yá qu'algamen tres menos de dos años d'esistencia lo que munchos grupos con ciertes similitues enxamás nun llegaron facer: n'agostu editen el so primer discu, La nuesa hestoria, col sellu L'Aguañaz. Nél incluyense 12 temas (3 d'ellos reversionaos d'Hestories absurdes) onde siguen les pautes marcaes dende l'entamu del grupu, nos sos conciertos y na so maqueta. El canciu Internacionalista algama un ciertu ésitu, sintiendose nes radios comerciales. Demientres el primer mediu añu del discu nel mercáu, viendense cásique milenta copies. De nueu n'ochobre, con motivu del conciertu Asturies nun escaez entamáu por Darréu, tienen la oportunidá de compartir escenariu con un grupu vascu del so estilu, Betagarri.

A lo llargu d'esi año, el grupu torna a dar unos venti conciertos, ente ellos ún en Segovia y otru en Guetxo. El 5 de payares s'atreven a realizar el percorríu d'una manifestación convocada pol Conceyu Abiertu pola Oficialidá demientres toquen el so repertoriu pa tolos asistentes xubíos nún camión, de forma desinteresada y énte 10000 persones.

L'añu 2006 entámenlu ganando'l Premiu al Meyor Cantar n'Asturianu d'Asturies.com, por votación popular al tema "Internacionalista". Percuerren práuticamente tola xeografía asturiano participando en dates importantes como'l Conciertu pola Oficialidá, GriescaFest2, el Festival Derrame Rock o la Noite Celta de Porcía -la más antigua d'Asturies-. Tamién tienen tiempu pa facer dos escapaes al País Vasco y una a Galicia. Demientres esti añu lleguen a compartir escenariu con bandes referenciales pa ellos como La Gran Orquesta Republicana, Skarnio, Banda Bassotti o The Locos.

El 22 de setiembre d'esi añu encabecen xuntu con Dixebra'l V Festival Puelles Rock, el so caberu conciertu enantes d'enzarrase nel llocal d'ensayu pa preparar el so segundu discu que s'asoleyará na primavera del 2007, depués de superar les 1000 copies del primeru.