Yousuf Karsh

De Uiquipedia

Yousuf Karsh, (23 d'avientu de 1908 / 13 de xunetu de 2002). Foi ún de los más valoraos fotógrafos de retratu del sieglu XX.

[editar] Biografía

Nació en Mardin (Turquía en 1908. A los 14 años coló cola so familia pa Siria fuxendo de la persecución turca. Trés años dempués asitiose en Sherbrooke, Quebec (Canadá), col so tíu, el tamién fotógrafu George Nakash. Foi quien decidiera unvialu como aprendiz a Boston (Estaos Uníos), al estudiu del retratista John Garo.

Dempués de cuatro años volvió pa Canadá, y abrió un estudiu n' Ottawa, cerca de la sé del gobiernu canadiense. Foi ellí u conoció al entós Primer Ministru del país Mackenzie King. Esa relación facilitó que fixera dellos retratos a mandatarios y personaxes públicos de la época. Pero'l momentu más importante foi la visita de Winston Churchill en 1941. El retratu que Karsh-y fixera al Primer Ministru británicu dió-y al fotógrafu reconocencia internacional y convirtiose n'ún de los iconos fotográficos del sieglu XX. La carrera de Karsh desenvolviose nos años siguientes col pasu per énte la so cámara de delles de les más reconocíes personalidáes del arte, la política y la ciencia del sieglu. Karsh morrió en 2002 n'Ottawa.

[editar] El so llabor

La obra de Karsh foi innovadora nel usu de la iluminación artificial pal retratu. L'usu d'efeutos escénicos p'acentuar dellos aspeutos del retratáu, el contraste de lluz y solombres, son delles de les característiques de la obra de so, considerada como una de les cimeres del retratu psicolóxicu.

El so retratu de Churchill foi, de xuru, el puntu crucial de la so carrera. Asoleyada na revista Life, algamó una difusión mundial y ye entá güei la so obra más reconocida. Karsh entamó dempués, cola compilación de retratos a delles personalidaes qu'él mesmu definiera como "los homes y muyeres que salvaran la nuesa civilización". La mediación del Primer Ministru permitió-y trabayar con 42 celebridaes. A ellos sumáronse lluéu, y por encargu de la revista "Life", decenes de cabezaleros mundiales. Esi trabayu permitio-y espublizar en 1946 "Faces of Destiny", una colección de personaxes internacionalmente reconocíos. A lo llargo de la so carrera, Karsh espublizó una quincena de llibros de retratos. N'ellos atopábense delles de les imáxenes más conocíes de xente como Albert Einstein, Albert Schweitzer, Alexander Calder, Andy Warhol, Audrey Hepburn, Clark Gable, Dwight Eisenhower, Ernest Hemingway, Fidel Castro, Jacqueline Kennedy, Frank Lloyd Wright, George Bernard Shaw, Georgia O'Keeffe, Grey Owl, Helen Keller, Humphrey Bogart, Indira Gandhi, John F. Kennedy, Laurence Olivier, Madame Chiang Kai-Shek, Muhammad Ali, Pau Casals, Pandit Nehru, Paul Robeson, Peter Lorre, Picasso, Pierre Elliott Trudeau, Isabel II d'Inglaterra, Grace Kelly, Robert Frost, Ruth Draper, y, por supuestu, Winston Churchill, ente otros. A la fin de la so obra, finada por él mesmu en 1987, Karsh reuniera alrodiu de 370.000 negativos, de los que 17.000 yeren retratos.