Mədinə Gülgün
Vikipediya, açıq ensiklopediya - ویکیپدیا ، آچیق انسایکلوپدیا
Mədinə Gülgün (1926-1992) ,Azərbaycanın görkəmli şairi, əməkdar incəsənət xadimi Ələkbərzadə Mədinə Nurulla qızı (Mədinə Gülgün) 1926-cı il yanvarın 17-də Bakıda fəhlə ailəsində anadan olmuşdur. Burada İbtidai məktəbi bitirmişdir. 1938-cı ildə ailəliklə Cənubi Azərbaycanın Ərdəbil şəhərinə köçmüşlər. Sonra Təbriz şəhərində yaşamış, əmək fəaliyətinə burada toxuculuq karxanasında başlamışdır. Gənc yaşlarından demokratik hərakata qoşulmuşdur. Sonralar Təbriz Dram Teatırında çalışmışdır. “Azərbaycan Qəzeti” redaksiyasında xüsusi müxbir işləmiş Mədinə Gülgün 1945-1946-cı illər Cənubi Azərbaycan Milli Azadlıq Hərakatının fəal iştirakçısı və öz mübariz şerləri ilə ömrü boyu bütün həmin inqilabın carcısı olmuşdur. O, 1948-ci ildə [Azərbaycan Pedaqoji İnstitutu]nun Dil və ədəbiyyat fakültəsinə daxil olmuşdur.
Mədinə Gülgün şerlərini 1945-ci ildə Təbrizdə “Vətən Yolunda”, “Azərbaycan” qəzetində çap etdirmişdir. Onun əsərləri bir sıra xarici ölkələrin dillərinə tərcümə olunmuşdur. Onun poeziyası ildən-ilə, kitabdan-kitaba zənginləşərək, əhatə dairəsi genişlənmişdir. Dünya xalqlarının azadlıq və istiqlaliyyət uğrunda mübarizəsini bir humanist şair kimi daim izləmiş, kəsərli sözləri ilə onların səsinə səs vermişdir. Şairin Bakıda və Moskvada “Təbrizin baharı”, “Çinar olaydı”, ”Arzu bir ömürdür”, ”Yora bilməz yollar məni”, “Könlümü ümidlər yaşadır” və onlarca diğər şer kitabı dərc olunmuşdur. Bu kitabların başlıca mövzusu insan, azadlıq, Təbriz həsrəti, insanlara canı yanan bir ana qəlbinin arzu və istəkləridir. Onun lirik şerləri və mahnıları dillər əzbəridir.
O, Azərbaycan Ali Soveti Rəyasət heyətinin Fəxri fərmanları (1960, 1974, 1986), ”Şərəf Nişanı” ordeni (1980), “21 Azər” (1946), “Əmək veteranı” (1948) və digər medallarla təltif olunmuşdur. Respublikanın Əməkdar İncənət xadimi fəxri adına layiq görülüb.
Mədinə Gülgün 1992-ci ildə fevralın 17-də Bakıda vəfat etmiş, Fəxri xiyabanda dəfn olunmuşdur.
[redaktə / تحریر] Əsərləri
- Gülgün M. Seçilmiş əsərləri: Şerlər və poemalar.- B.: Azərnəşr, 1986.- 304 s.
- Gülgün M. Arzu da bir ömürdür: (Şerlər və poemalar).- B.: Gənclik, 1976.
- Gülgün M. Dünya şirin dünyadır.- B.: Gənclik, 1989.- 200 s.
- Gülgün M. Mən bu ömrü yaşadım: (Şerlər).- B.: Tədris, 1997.- 87 s.
- Gülgün M. Qürbət elə qürbətdi; Bir dəli rüzgarım...; Danişım danışmayim...: (Şerlər) //Ədəbiyyat qəzeti.- 1993.- 26 fevral.
- Gülgün M. Novruz bayramına həsr olunmuş şer //Respublika.- 2003.- 20 mart.
- Gülgün M. Yaşadı; Sarı bülbül; Ehey...: (Şerlər) //Ədəbiyat qəzeti.- 1992.-1may.- S.8
[redaktə / تحریر] Haqqında olan ədəbiyyat
- Nəsib D. Bir şəkil-bir xatirə:/M. Gülgün ilə bağlı xatirə/ // Ədəbiyyat qəzeti.-1998.-26 iyun.-S.2.
- Nəbioğlu S.Susmayan rübab: /Mədinə Gülgün haqqında/ //Xalq qəzeti.-1996.-14 fevral.
- Yusifli V.Bahrı soraqlayırdı: Mədinə Gülgün-70/ //Yeni Azərbaycan.-1996.-6 yanvar.
- Qabil. Sevənlərin ürəyində: /Mədinə Gülgün haqqında/ //Ədəbiyyat qəzeti.- 1993.- 26 fevral.- S.4.
- Rüstəmzadə V.Səni: M.Gülgünün əziz xatirəsinə: /Şer/ // Ədəbiyyat qəzeti.-1991.- 22 fevral.
- Paşayeva M.Mədinə Gülgünlə ilk tanışlıq və son görüş //Vətən səsi.-1991.-30 aprel.
[redaktə / تحریر] Mənbə
Bu məqalənin müəllifi M.F.Axundov adına Azərbaycan Milli Kitabxanasının Diyarşünaslıq və Milli Biblioqrafiya şöbəsinin baş kitabxanaçısı Zəminə Əhmədovadır. Kitabxananın internet səhifəsindən aşağıdakı ünvandan alınmışdır: http://www.anl.az/down/elametdar.htm
