Obelix

Aus Wikipedia

Da Obelix is a Phantasieg'schtoit' vom Herrn Albert Uderzo aus'm Franzosnland. Da Obelix lebt sei Lebm in ana Reih' vo Buidabiachen de ma "Comics" nennt.

De Zeit wo des Comic spuit is de Zeit wo de oid'n Röma des hoibade Europa besedzt hom. Domois war des Fanzosnland no Teil vo Gallien und da Vercingetorix, da Schef vo de (französischn) Gallier hodt se eigantlich de Röma und eanam Chef, dem Gaius Julius Cäsar untawoafa. Nua oa oanzigs Doaf hodt se draudt und eahm und seine Soidaten, de Legionäre, Widastand g'leist.

Noch da Legend is da Obelix ois kloana Bua in an Hofa mit Zaubatrank eineg'foiin und hodt seitdem b'sondane Kräft'. Vo Beruf is'a Hinklstoaliferant. A Hinklstoa is a groß Trumm Stoa dea a Foam hodt ois wia umdrahtda Dannazapfa. Da Obelix schaugt a ungefähr a so aus, bloß dass'a no dicka is ois wia seine Hinklstoa, eigantle mehra wiara Birn, und oiwei a weiß-blau-g'schtreifte (da Län'g noch, wei des schlangg macht!) Hosn o'hodt.

Da Obelix is a kloans bissal langsam im denga, des gleicht'a aba durch sei Guatmiatigkeit und sei große Trei zu seim Doaf und im speziell'n zu seim Spezi, dem Asterix aus. Wofüa ma an Obelix olldiwei hom ko is a kräftig Raafarei mit de Römer oda a Wuidsau. As Bia duatd eam nedt'a so guat, weil'a ja sunst nua a Goassnmilli dringgt, und an Zaubadrank deaf'a aa nimma, weil's'n sunst vastoanadt. Eah duadt gean dabailde Häi'm sammen, de'a de Röma vo de Ruam' oweahudt und eah hodt a b'sondare Schwäch'n füah des Deandl Falbala.

Sei besta Spezi is da Asterix und sei Hundal, da Ideefix.

[dro wärkln] Literatua'

• Band 35 (Boarisch III) vo de Mundartbänd' vom EHAPA Valag: "Graffd wead!" (Hochdeitsch: Der Streit um Asterix, übasetzt vom Hans Well)
• Band 23 (Boarisch II) vo de Mundartbänd' EHAPA Valag: "Asterix drendd im Oriendd" (Hochdeitsch: Asterix im Morgenland, übasetzt vo Wolfgang Fuchs und Sebastian Schuhbeck)
• Band 9 (Boarisch I)vo de Mundartbänd' EHAPA Valag: Auf geht´s zu de Gotn! (Hochdeitsch: Asterix und die Goten, übasetzt vom Hans Well
• Band 35 (Münchnarisch I) vo de Mundartbänd' EHAPA Valag: Ozabfd is! (Hochdeitsch: Der Kampf der Häuptlinge, übasetzt vo' Carl-Ludwig Reichert und Franz Leitmayr)
• Band 8 (Weanarisch I) vo de Mundartbänd' EHAPA Valag: Da grosse Grobn (Hochdeitsch: Der große Graben, übasetzt vo' Willi Resetarits alias Dr.Dr. Kurt Ostbahn)
• Band 17 (Weanarisch II) vo de Mundartbänd' EHAPA Valag: Da Woasoga (Hochdeitsch: Der Seher, übasetzt vo' Willi Resetarits alias Dr.Dr. Kurt Ostbahn und füas "Schönbrunner-Deutsch" da Gerhard Förster.)
• Band 32 (Weanarisch III) vo de Mundartbänd' EHAPA Valag:Da Legionäa Asterix (Hochdeitsch: "Asterix der Legionär", übasetzt vo H. C. Artmann)
• Band 18 (Fränggisch I) vo de Mundartbänd' EHAPA Valag: Di Haibtling´ raffm´s raus! (Hochdeitsch: Der Kampf der Häuptlinge, übasetzt vo' Gunter Stössel und Christian Gross)
• Band 29 (Fränggisch II) vo de Mundartbänd' EHAPA Valag:Asterix und es Gscheiderlä (Hochdeitsch: Asterix und Maestria, übasetzt vo' Gunter Stössel und Christian Gross)
• Band 39 (Käantnarisch I) vo de Mundartbänd' EHAPA Valag: Asterix ols Gladiator-Kämpfa (Hochdeitsch: Asterix als Gladiator, übasetzt vo' Armin Assinger)
• Band 39 (Tirolerisch I) vo de Mundartbänd' EHAPA Valag:Obelix und's groasse Gschäft (Hochdeitsch: "Obelix GmbH & Co. KG", übasetzt vo' Felix Mitterer)
• Band 48 (Südtirolerisch I) vo de Mundartbänd' EHAPA Valag:Asterix ba d'r Naia (Hochdeitsch: "Asterix der Legionär", übasetzt vo Günther Heidegger)
• Band (Südtirolerisch II) vo de Mundartbänd' EHAPA Valag: Asterix isch kesslun (Hochdeitsch: "Asterix und der Kupferkessel", übasetzt vo Günther Heidegger)
• Band (Südtirolerisch III) vo de Mundartbänd' EHAPA Valag: Olls Lai Lolli (Hochdeitsch: "Das Geschenk des Cäsar", übasetzt vo Günther Heidegger)