Alfeus
Diwar Wikipedia, an holloueziadur digor
Alfeus ( Αλφειός, e gregach, a dalv kement ha gwennik), a zo anv un doue-stêr, anavezet ivez evel Alfeiós, Alpheios pe Alfiós e latin, hag evel-just mab da Okean ha Tetis, evel an holl doueed-stêrioù.
Un nebeud mojennoù zo diwar o fenn.
1. Alfeus an den. P’edo o chaseal e koadeier Hellaz e welas Alfeus an doueez Artemis, ma savas dezhañ c’hoant anezhi. Mont a reas d’he heul a-dreuz Hellaz penn-da-benn ken na erruas e Letrinoi. Eno e welas Artemis gant he nimfezed o labezañ o dremmoù gant pri . Tapet ar paotr a oa gant ar c’hoant da reiñ ur frielhad da Artemis : ne oa ket evit anavezout anezhi diouzh ar re all. Hag eñ kuit. Chañs en doa bet avat, rak alies e veze ket kastizet buan ar wazed gant an doueez, brouezekoc’h an ton anezhi peurvuiañ. 2. Alfeus ar stêr. C’hwitet gantañ e daol gant Artemis , setu Alfeus oc’h orgediñ ouzh unan eus he nimfezed, Aretusa, un deiz ma oa en he noazh o kouronkañ. Met ar plac’h a oa evel an doueez, troet gant ar chase hag ar redadennoù er c’hoadeier muioc’h eget gant c’hoari daou gant gwazed. Redek a rae ar stêr war-lerc’h ar plac’h, ken na errujont dirak enez Ortygia . Hag Aretusa da c’hervel Artemis d’he saveteiñ eus briatad Alfeus, hag an doueez da dreiñ anezhi en ur wazh. War-lerc’h redek dre Hellaz penn-da-benn ha dindan ar mor zoken, e tiflukas Alfeus en he c’hichen, ma en em veskas o doureier.