Ernesto Lariosa
Gikan sa Wikipedia, ang gawasnong ensayklopedya
Si Ernesto Digumbis Lariosa, natawo sa San Fernando, Sugbo usa ka premyadong magsusulat sa pinulongang Binisayang Sinugboanon.
Siya nakahuman sa pagka abogado niadtong 1985.
Kay magbabalak usab, damgo niya nga makatampo aron ang Sinugboanong pamalak matikad ug molam a ikaindig sa pamalak sa kalibotan. Ang iyang gumaran mao nga kinahanglan ang pamalak Sinugboanon motubo sa dugokan, unod, porma ug panlantaw.
[usba] Karera sa panulat
Sa tuig 1991 nadaog niya ang grant sa pamalak nga Sinugboanon gikan sa Sentrong Kultural sa Pilipinas. Dinhi iyang gipaila ang 4-s nga pamalak Sinugboanon sama sa social sense, sound ug story. Ang lengguwahe yano, naglikay sa hugot nga metapora-- mga pinulongan sa pinuy-anan ug kadalanan.
Sa 1993 nadaog usab niya ang laing grant sa CCP apan sa lahi nga matang sa panulat, ang gumalaysay Mga Habo-habo Sa Sapa-sapa. Sa maong gumalaysay, gipangisgan niya paghukngay ang pamalak Sugboanon gikan ni Vicente Ranudo hangtod sa kontemporaryo sa pagsulat niya sa maong piyesa. Gipakita niya sa maong obra ang hiyas sa iyang pagka kritiko.
Sa iyang pagka magbabalak, nahitipon siya sa symbolist, dayon sa imagist group. Usa siya sa nag-unang protagonista sa gibantog kanhing ALBICALARIVI Poetry Group ug usa sa tinamod nga mga haligi sa BATHALAD-Sugbo diin nahimo siyang pamuno niini sa duha ka higayon (1989-1990 ug 1996-1998).
[usba] Mga pasidungog
Sa iyang pagka magbabalak ug magsusulat, nadaog niya kining mosunod nga mga ganti:
- Unang Ganti, Bangga sa Balak sa Lubas sa Dagang Bisaya (LUDABI), 1975
- Unang Ganti, sugilanon (Palanca Awards) 1997
- Ikatulong Ganti, sugilanon (Palanca Awards) 1998
- Ikatulong Ganti, sugilanon (Palanca Awards) 2002
- Ikaduhang Ganti, pungpong sa mga balak (Gawad Komisyon), 2006
- Unang Ganti, Bangga sa Artikulo sa LUDABI
- Ikaduhang Ganti, Bangga sa Balak (Cebu Arts Foundation, Inc.), 1983
- Ikatulong Ganti, Bangga sa Balak (Dagang Foundation, Inc.), 1992
- Ikatulong Ganti, Bangga sa Artikulo (Sun*Star Daily), 1991
- Hawanan sa Kabantog, tungod sa pagdaog og lima ka unang ganti sa balak (BATHALAD-Sugbo, 2006)
- Resipyent sa "Gawad Alagad ni Balagtas" UMPIL Award, 200?
Nakapamantala usab siyag mga balak nga Iningles. Nahimong national awardee sa Focus Philippines sa 1975; ug nahimong writing fellow sa National Summer Writer's Workshop sa Unibersidad sa Siliman sa tuig 1972 ubos sa pagdumala sa magtiayong mga magsusulat: Dr. Edilberto Tiempo ug Dr. Edith Tiempo.
Retirado siyang tigpamaba sa National Food Authority ug language consultant sa Sun*Star Suber Balita.
