Çurçuvint

De Vichipedie, la enciclopedie libare dute in marilenghe.

Çurçuvint al è un che al dì di vuê al fâs part de provincie di Udin e al à 770 abitants.

Indis 1 Geografie 2 Storie 3 Di viodi 4 Steme comunâl

[cambie] Geografie

Çurçuvint, logât inte Cjargne a 607m, e jè la puarte d’entrade de Val Cjalde ch’e coleghe il Cjanâl di San Pieri al Cjanâl di Guart passant par Monai. Il comun al è componut es frazions di Çurçuvint di Sore, Çurçuvint di Sot e des localitâts di Cjandeli, Coste e Vidâl.

[cambie] Storie

L’origjin dal non no è ancjmò dal dut sigure e e dà vite a diviersis interpretazions, cualchidune che e fâs riferiment a sô posizion in sorêli e parade dal vint (dal latin circum venti agunt), altris che disin di une antighe arimanie longobarde. Di sigûr il puest al ere cognossût pal fat che al ere zone di passaç e di colegament no dome pe Val Cjalde, ma encje pe vecje strade Vie Julie Auguste che da Aquilee e rivave sù fintramai al Pas di Mont di Crôs e pò e leve indenant pe Austrie. Al samee che une volte e si cjatàs une borgade inte Mûse, propit subit disore dal simiteri di vuè, che par vie di un grant slac e jè stade netade dutune cu la borgade di Cente. Cun ogni probabilitât i prins cjasàis a son stâts chei di Cjavrìas e di Cjamarinùs. Tal 1200 e ven citade tai documents la vile di Cueste (vuè frazion di Çurçuvint cun Vidâl, Cjandelìn e Fascin). Un document ch’al puarte la date dal 1275 al fâs riferiment ae glesie di San Martin; al va det che la Plêf di San Martin e jè l’uniche te valade dal Bût a no dipendi da Plêf di San Pieri di Zui. Lis melodiis dai cjants di glesie (gjespuis, salmos, e v.i.) àn la stesse cadence di chês de Plêf di Guart di Davâr; di fat Çurçuvint al colave sot la gjurisdizion da Plêf di Guart. Cuant che cheste Plêf a è passade sot de Badìe di Mueç ancje la glesie di Çurçuvint e à fate la stesse fin. I predis in cure di animis a vignivin nomenâts dal Abât o miôr a vignivin presentâts ae comunitât parcèche i cjaufameis des dôs vilis a vevin il dirit di sielgisi il lôr predi (jus patronatus). Soprimude la Badìe di Mueç (dopo il 1728) la glesie di Çurçuvint e no jè stade sogjete a nissune Plêf Mâri e ai 7 di setembar dal 1794 il Vescul di Udin, tignint cont dai vecjos documents e da impuartance storiche da glesie, i à dât il titul di Plêf e ai predis chel di Plevan. Tal 1912 il Vescul Rossi al à metût inpîs il Vicjariât di Paluce, al à distacât Çurçuvint dal Arcidiacunât di Guart insedantlu te nove foranie di Paluce dulà ch’al è ancjmò vuè. I agns miôr pal paîs a son chei ch’a van dal XVI al XVII secul, difat si puedìn viodi ancjmò bielis cjasis di chê epoche insioradis cun lavôrs in len, in tof lavorât e in fier batût. Çurçuvint al pues contâ suntun biel patrimoni rurâl architetonic tipicamenti cjargnel recuperât e comedât daspò dal taramot dal 1976. Tal 1916 cuatri alpins, ducj furlans, a son stâts fucilâts tal sagrât de glesie di Çurçuvint. Chi sot a son ripuartâts i nons di chescj cuatri puars alpins, che 80 ains daspò de lôr muart a son stâts clamâts inocens:

• Silvio Gaetano Ortis, di Paluce

• Angelo Massaro, di Manià

• Basilio Matiz, di Tamau

• Giovan Battista Corradazzi, di For Disore

[cambie] Di viodi

• Mulin di Badai Une volte jentrâts tal paîs, su pe diestre, a si viôt une costruzion basse cul tet di cops: e si trate de sie e dal mulin di Badai. La costrusion e jè une vore vecje al si dîs ch'e sedi dal XVII secul, date gjavade dai documents di concession par podê doprâ l’aghe de Bût. Un timp si cjatavin, oltre ae sie, ancje doi mulins: un, cuntune muele di clap par masinâ farine di flôr (doprade par fâ il pan) e chel altri cu la muele in tof par masinâ la farine da polente.

• Farie di Checo E jè un laboratori di fari dal dut restaurât e mudât in piçul, ma interessant musei. Lis sô origjinis a si piardin te gnot dai timps, ma tes cjartis si cjate nominade la farie bielzà tal 1426; a à lavorât fintramai al 1966, cuant che une gruesse plene de Bût la ruvinà. Il propietari, Candido Silverio, al à regalade la struture ae Comunitât Montane de CJargne che à proviodût a tornâle a metile in sest e funzionant come un timp. Biele da viodi la fusine complete di ducj i imprescj movûts dae fuarce da l’aghe: il soflet, la muele par guçâ, il mai; interessant il piçul laboratori cu la mostre dai imprescj di lavôr e dal campionari da produzion de farie. Difûr si viôt il vagn cun dut ce ch’al coventave par diregi l’aghe, vêr motôr ch’al faseve movi ducj i imprescj da farie. La Farie di Checo si pues visitâ telefonant al n. 0433778407.

[cambie] Steme comunâl

La Rose dai vints e rivuarde l’etimologje dal non circum venti agunt ven a jessi ‘circundât dai vints’. Il Gjal al riclame la dipendence da glesie ae antighe Badìe di Mueç fondade dai fraris dal ordin di San Gjal, ch’a vignivin dal cjanton de Svuizare ch’al puarte il stes non. Il font ros e blu: a son lis dôs frazions di Di Sore e di Di Sot che par une volte a davin vite a doi comuns e che Napoleon di doi a ‘nd’à fat un.