Batajon Cividât
De Vichipedie, la enciclopedie libare dute in marilenghe.
Il Batajon Cividât al nassè tal 1909 come un dai trê batajons dall'8° alpins e al cjapave dentri la 16^, la 20^ e la 76^ compagnie alpine. Cualchi timp prime de prime vuere mondiâl i fo assegnade ancje la 110^ compagnie.
[cambie] La prime vuere mondiâl
Juste scomençade la prime vuere mondiâl, ai 24 di mai dal 1915, tal batajon i fo il prin colât de vuere, Riccardo di Giusto, udinês, muart sul Colôrat, dongje Drencje. Il batajon al combatè te zone dal Mont Neri e dal cors median dal Lusinç fin ae viarte dal 1916, cuant ch'al fo mandât sul Altiplan dai siet comuns, tal Venit, e tal Trentin. Propite culì il batajon al meretà la medaje di bronç pe buine condote tignude tai combatiments des gjornadis 23, 24 e 25 di mai dal 1916. Daspò de rote di Cjaurêt, tal otubar dal 1917, il batajon al fo inviât sul Monte Grappa par cirî di contignî lis trupis austro-todescjis ch'a vevin passade la Plâf. Tal period viarte-istât dal 1918 o viodin il "Cividât" logât in Valtellina, di dulà al tornà pò sul Grappa par cjapâ part ae grande bataje di Vitorio Veneto (Cènede), cun cui e terminà la vuere.
[cambie] La seconde vuere mondiâl
Te seconde vuere mondiâl il batajon, ch'al faseve part de gloriose Division alpine Julia, al partecipà ae campagne di Grecie (28 di otubar dal 1940 - 23 di avrîl dal 1942), dulà ch'al si distinguì tai combatiments sul Pindo, sul Topojanit, sul Golico e soredut sul puint di Perati. E propite "Sul ponte di Perati" e je intitulade une des plui innomenadis cjançons dai alpins, che te nestre lenghe e sune plui o mancul cussì:
Sul puint di Perati bandiere nere
al è il coròt dai alpins ch'a van ae vuere
Al è il coròt dai alpins ch'a van ae vuere
la miôr zoventût ch'a và sot tiere
Chei ch'a son partîtis no son tornâts
su lis monts de Grecie a son restâts
Su lis monts de Grecie e jè la Vojusse
cul sanc dai alpins e si è fate rose
Te viarte dal 1942 il "Cividât" al tornà in Italie par jessi mandât tal avost dal midiesim àn, tal mût di dute la Julia, in Rusie, là ch'al cjaparà part ae grande ritirade tal unviâr dal 1943. A erin partîts in 1500, ma a tornarin dome 500 di lôr. Tornât in Italie, il Cividât al fo ricostituît cun gnûfs elements che insieme cui "veci" ch'a vevin fate Grecie e Rusie e al fo mittût al cunfin orientâl a combati cuintri i partezans sclâfs. Daspò dai fats dai 8 di setembar dal 1943 il "Cividât" al fo disfât
[cambie] Daspò lis vueris
Mitût adun une altre volte a vuere finide, tal 1948, cun sede prime a Cividât e pò a Scluse, il batajon al puartà jutori aes popolazions cjapadis dal taramot, prime culì in Friûl tal 1976 e pò in Irpinia tal 1980. Tal 1992 al passà tal 15° Alpins, e tal 1994 al partecipà a une mission di pâs in Mozambico. Al fo disfât ai 15 di novembar dal 1995.
