Redbad
From Wikipedy
Redbad, of Radboud (likernôch 647 - 719), wie in Fryske kening. Under syn regear berikke it Fryske Ryk syn grutste útwreiding.
Ynhâld |
[bewurkje seksje] Famylje
Redbad libbe yn de iere Midsieuwen. Hy moat sels likernôch 647 bêrne wêze, as soan fan Aldgillis. Mei wa at er boaske wie is net bekend, mar mooglik hienen se fjouwer bêrn.
- Aldgillis, bêrne likernôch 673, jong ferstoarn (674-675).
- Poppo, bêrne likernôch 674, opfolger fan Redbad.
- Aldgillis II, bêrne likernôch 675
- Thiadsvind, bêrne likernôch 677.
[bewurkje seksje] Kriich foar 690
Meast wurdt oannaam dat Redbad syn heit yn 679 opfolge. It Fryske ryk dat er oernaam wie yn it súden al lytser wurden: de Franken hienen de Friezen werom dreaun nei de Ryn. Doe't nei syn heit yn 680 ek de Frankyske lieder hofmaarskalk Ebroïn ferstoar, wist Redbad gebrûk te meitsjen fan de opfolgingsproblemen by de Franken en befrije er it gebiet tusken de Ryn en Skelde. Mar nei't yn 687 Pipyn II by de Franken de macht krige, waard it gebiet wer ynnaam troch de Franken. Yn 689 ferlear Redbad de Slach by Dorestêd, mar noardliker as Dorestad kamen de Franken noch net.
[bewurkje seksje] Frede
Nei 690 liket der in soart fan bestân tusken Friezen en Franken west te hawwen. Redbad syn dochter Thiadsvind boaske yn 695 mei Grimoald, de soan fan Pipyn, mar der binne gjin bern fan harren bekend. Neffens de leginde wie de frede op dat stuit sa folslein dat Willibrord, dy't oan dy tiid allinnich yn de gebieten dy't de Franken ynnaam hienen kerstene, oan it hof fan Redbad komme mocht. It soe like hawwe as woe Redbad him foar de frede ek noch kerstenje litte, mar úteinlik moat er dochs keazen hawwe foar it leauwen fan syn folk en syn âldfaars. Hjirefter bekuolle de relaasje tusken Redbad en de misjonarissen, en by syn libben hienen se net folle ynfloed op Frysk gebiet.
[bewurkje seksje] Kriich nei 714
Doe Pipyn yn 714 ferstoar makke Redbad op 'e nij gebrûk fan de problemen mei de opfolging. Hy koe sels in ferbûn slette mei de Frankyske Raganfried en syn legers koenen yn 716 oant Keulen ta yn it gebiet fan de Franken yndringe. Op dy wize koe er ek alle Fryske gebieten besuden de Ryn noch ien kear befrije. Sels waard al dy tiid siik, en nei seis jier syktme ferstoar er yn 719, en waard er opfolge troch Poppo, heechst wierskynlik syn soan.
[bewurkje seksje] Redbad yn lettere tiden
Redbad hat syn namme yn de 20e ieu ek noch jûn oan de Fryske studinteferiening fan Utert. Dizze feriening bestiet lykwols net mear.
[bewurkje seksje] Bekende Fries
Yn in ferkizing, dy't yn 2004 troch de studinteferiening Bernlef yn Grins holden waard, waard Kening Redbad mei 900 fan de 3500 stimmen keazen ta de ferneamdste Fries ea.
