Sint Piter
From Wikipedy
Sint Piter is in feest dat elts jier op 21 febrewaris yn Grou fierd wurdt. It wurdt faak fergelike mei Sinterklaas, mar it is in oar feest, net allinnich kwa datum, mar ek wat de opset oangiet.
[bewurkje seksje] Oarsprong fan Sint Piter
Der is in moai ferhaal oer de twa bruorren Sint Nicolaas en Sint Piter, dy't elts jier op 5 desimber tegearre nei Nederlân kamen mei presintsjes, oan't de kear doe't se de sek foar Grou ferjitten wienen, en Sint Piter werom gong, en sa einlings earst yn febrewaris in Grou oankaam. Mar de oarsprong fan it feest is dochs wat oars.
Ear't Fryslân kerstene waard koe men yn Fryslân it Maitydsfeest. Om't de tsjerke heidense feesten ferfong troch Kristelike feesten waard it maitydsfeest feroare yn it feest fan Sint Petrus.
Mei de ieuwen is it feest, it Sint Piterfeest, hast oeral út de moade rekke, mar yn Grou is it bleaun. Krekt wêrom dat sa wie is net dúdlik. Faaks om't Sint Petrus, de patroan fan Grou wie. (Grou hat hieltyd noch in Sint Pitertsjerke). Faaks ek wie Grou sa isolearre troch it wetter dat âlde brûken dêr net sa maklik troch oare ferfongen waarden.
[bewurkje seksje] Feroarjend Sint Piterfeest
Yn de 19e ieu wie de Sint Piter ien dy't mei in ketting oan de foet, en mei in duffelske jas oan troch it doarp gong, mei op dy jas snobbersguod en fruit. As er dan in wente yn gong, koenen de bern der wat fan ôf helje. En dan gong er wer fierder.
Mar oan it begjin fan de 20e ieu wie der eins net sa folle mear oer fan it Sint Piterfeest. Doe hat in beukerjuffer út Grou, juffer Jansen, de hjoeddeiske Sint Piter betocht, mei syn sêfte wite burd, syn wite tabberd en reade miter en syn staf, en ek it ferhaal oer de twa bruorren. No komt Sint Piter elts jier mei de boat oan, tegearre mei in swarte feint, en hy rydt op in swart hynder troch it doarp. Yn it ferline wie dy oankomst op 21 febrewaris, mar sûnt 1971 komt St. Piter yn Grou oan op de sneon foar syn nammedei.
[bewurkje seksje] Sint Piter yn Grou
Hjoeddeisk wurdt der yn Grou in soad dien foar it Sint Piterfeest. Sa fiere de skoallen, sûnt 1958, in drok-besocht Sint Pitermearke op. En om dat moochlik te meitsjen is der in Sint Piterbeurs, dêr't moais en lekkers dat de Grouwsters sels makke hawwe ferkocht wurdt. De winkels yn it doarp dogge ek mei. Net allinnich mei Sint Piter fersiering en muzyk, mar ek trochdat skuontsjes fan de bern yn it doarp yn de winkel-etalaazjes set wurde mei in ferassing der yn. De bern hawwe sa elts jier in moaie speurtocht en sykje harren skuon.
