George Nicolas Papanicolaou
Ón Vicipéid, an chiclipéid shaor.
Lia agus paiteolaí ab ea é George Nicolas Papanicolaou (Gréigis: Γεώργιος Παπανικολάου). Rugadh ar an triú lá déag de mhí na Bealtaine sa bhliain 1883 in Euboa sa Ghréig é, agus fuair sé bás ar an naoú lá déag de mhí Feabhra sa bhliain 1962. Fuair sé dintiúirí an dochtúra sa Ghearmáin, in Ollscoil München, sa bhliain 1910, ach is sna Stáit Aontaithe a rinne sé an chuid ab fhiúntaí de shaothar a shaoil. Bhí sé ag obair in Ospidéal Nua-Eabhraic agus in Ollscoil Cornell, i gColáiste Míocháine Weill.
B'í an fhionnachtain ba thabhachtaí a d'éirigh leis ná tástáil Papanicolaou nó "smearadh Pap" a chuireann ar chumas na ndochtúirí ailse mhuineál na broinne, ceann de na cineálacha ailse is coitianta ag na mná, a aithint go luath. Is gnách an modh tástála seo a úsáid sa lá atá inniú ann. Tríd an tástáil shaor shábháilte seo is féidir sonrú a chur san ailse chomh moch agus gur féidir an t-othar a leigheas le hobráid shimplí.
Rinne an dochtúir Papanicolaou an chéad chur síos ar an modh tástála seo in alt dar teideal “Diagnosis of uteral cancer by vaginal smear” a foilsíodh sa bhliain 1943. Inniu féin, sábhálann an tástáil beatha na mílte ban gach bliain. Scaip an modh tástála seo ar fud an domhain mhóir ó shin agus tá tionscadail ollmhóra leighis bunaithe air anois.
