Isca (política)
Na Galipedia, a wikipedia en galego.
Isca é o nome dunha organización política xuvenil de ideoloxía nacionalista e de esquerda anticapitalista.
Constituída o 16 de xullo de 2006 en Santiago de Compostela, en Isca participa un grupo de militantes escindidos da UMG en xaneiro de 2006, conxuntamente con outros sectores críticos de esquerda dentro de Galiza Nova, a organización xuvenil do BNG. A súa primeira aparición pública tivo lugar o 25 de xullo de 2006, día da Patria, na manifestación convocada polo BNG.
Entre os seus membros destacados cóntase Xosé Emilio Vicente Caneda, que no momento da creación da organización era secretario xeral de Galiza Nova.
O seu obxectivo é "aglutinar diferentes sectores da mocidade galega especialmente críticos coa deriva da política institucional", o electoralismo e a mercadotecnia que segundo eles levan outras formacións nacionalistas como a UMG e a UPG. Entenden que en Galiza existe un marco de loita de clases, polo que negan a posibilidade dunha política interclasista, negan o que eles denominan as "visións pesimistas sobre a sociedade galega", apostan pola relación horizontal entre o BNG e os movementos sociais, e postulan o dereito de autodeterminación como "irrenunciábel do pobo galego".
