María Pita
Na Galipedia, a wikipedia en galego.
María Mayor Fernández de la Cámara Pita, coñecida popularmente como María Pita, foi unha heroína coruñesa. Naceu arredor de 1560 no seo dunha familia modesta. En 1581 contraeu matrimonio con Juan Rois, ao que lle seguirían outros tres esponsais máis: co carniceiro Gregorio de Rocamonde, co mestre de navío Sancho de Arratia e co escudeiro da Real Audiencia Gil de Figueroa, cos que tivo un total de catro fillos.
É moi coñecida debido á súa defensa da Coruña nun ataque inglés, cando fixo retroceder unha compañia inimiga, que recuou ao ver que o seu alférez fora morto por unha muller. Á marxe da súa intervención no cerco, a súa vida estivo chea de vicisitudes, entre as que figuran numerosos preitos e dúas viaxes a Madrid por causa deles. Faleceu en Cambre en 1643 e aínda que no seu testamento solicitaba ser enterrada no convento de Santo Domingo da Coruña, non se conserva ningún documento que o acredite nin se puido identificar a súa tumba.
Conmemórase a súa memoria coa praza do concello en A Coruña e unha estatua cunha chama sempre acesa.
