Normalización lingüística

Na Galipedia, a wikipedia en galego.

Obxectivo do ecoloxismo lingüístico, a normalización lingüística é o proceso tendente a converter unha lingua no vehículo normal de comunicación dunha comunidade. Non debe confundirse con normativización, que é o proceso de estandarización ou fixación formal de todo o corpus da lingua, aínda que este é o significado que se lle dá á palabra na sociolingüística hispánica.

Índice

1 Factores normalizadores
2 Normalización vertical e horizontal do galego
3 Ligazóns exteriores
4 Compárese con

[editar] Factores normalizadores

O proceso normalizador dependen para o seu avance de tres factores:

Da acción institucional da comunidade, materializada mediante o poder político, que deberá proporcionar, por medio dunha determinada política lingüística, a lexislación, as medidas e o apoio necesarios tendentes a favorece-lo proceso de normalización lingüística. As institucións públicas teñen a posibilidade de normalizar unha parte moi importante dos ámbitos sociais e de favorece-los procesos de normalización lingüística colectivos e individuais
Da acción colectiva non institucional daqueles individuos que posuíndo unha conciencia lingüística se agrupan para pular pola marcha do proceso normalizador.
Da acción individual, asentada na vontade de ser das persoas que forman a comunidade lingüística. Sen este factor básico o proceso nunca se levará a término.

[editar] Normalización vertical e horizontal do galego

A normalización individual (normalización vertical ou do individuo) non se pode acadar sen un proceso consciente e voluntario de galeguización, pois na sociedade galega de hoxe non se dan os condicionantes socioculturais e políticos que permitan ó individuo acceder á expresión completa en galego dunha maneira natural, espontánea e involuntaria.. Así, a normalización lingüística vertical (individual) require un importante esforzo persoal e, aínda que é un fenómeno en aumento, resulta insuficiente, non xa para avanzar no proceso normalizador, senón mesmo para contrarresta-la progresiva perda de usuarios. Na actual situación, a normalización lingüística horizontal, aquela que se produce galeguizando ámbitos, sectores ou áreas da vida social, é a que se presenta como camiño viable e factible de expansión do galego, a que se pode atinxir dunha maneira progresiva no conxunto da sociedade.