Sarabia
Na Galipedia, a wikipedia en galego.
A sarabia, ou pedrazo, é un tipo de precipitación que consiste en partículas irregulares de xeo. A sarabia xérase en tormentas intensas en que se producen gotas de auga sobrearrefriadas, líquidas pero a temperaturas por debaixo do seu punto normal de fusión (0ºC), e ocorre tanto en verán coma en inverno. Pero dáse máis cando está presente a canícula.
Cando as gotas de auga sobrearrefriada chocan na nube con outras partículas xeadas ou grans de po poden cristalizar sen dificultade conxelándose rapidamente ó seu redor. Nas tormentas máis intensas prodúcese precipitación xeada en forma de sarabia especialmente grande cando esta se forma no seo de fortes correntes ascendentes. Neste caso a bola de sarabia pode permanecer máis tempo na atmosfera dispoñéndose dunha maior capacidade de crecemento. Cando o empuxe cara a arriba cesa ou a sarabia acadou un tamaño elevado o aire xa non pode aguantar o peso da bola de sarabia e esta acaba caendo.
As bolas de sarabia acostuman ser pequenas, dalgúns milímetros de diámetro. Así a todo, de vez en cando orixínanse bolas moito maiores, de varios centímetros de diámetro debido a que na circulación ciclónica da tormenta, as pequenas bolas ascenden e descenden varias veces formándose distintas capas de xeo, unhas sobre outras. Dependendo do seu tamaño, as bolas de sarabia poden non ser máis ca unha pequena molestia, causar danos en automóbiles e estruturas de cristal ou incluso matar a persoas. Debido ó seu proceso de formación todas elas teñen unha estrutura en forma de capas de cebola.
En España nas Comunidades de Castela León, Castela A Mancha e parte de Aragón as campás das igrexas facían o toque de tentenublo para afastar as tormentas de sarabia.
A bola de sarabia máis pesada rexistrada caeu en Coffeyville, Kansas (Estados Unidos), o 3 de setembro de 1970, e pesaba 770 gramos, tendo un radio de 14,5 cm. A bola de sarabia máis grande que se rexistrou caeu en Aurora, Nebraska o 22 de xuño do 2003 e tiña un radio de 17,8 cm, inda que o seu peso era inferior á que se encontrou en Coffeyville.
