User:Haukurth/GG test
From Wikipedia, the free encyclopedia
Gylver var maðr vitr ok hugsaði þat er allir lýðir lofuðu þá ok allir hlutir gengu at vilja þeira, hvárt þat mundi af eðli þeira vera, eða mundi guðmögnin valda því. Hann fór til Ásgarðs ok brá á sik gamals manns líki, en Æsirnir váru því vísari at þeir sá ferð hans ok gørðu í móti sjónhverfingar. Þá sá hann háva höll. Þak hennar váru þökt gylldum skjöldum sem spánþak. Svá segir Þjóðólfr:
- 1. Á baki létu blíkja,
- barðir váru grjóti,
- Svölnis salnæfrar
- seggir hyggjandi.
Gylver sá mann í hallardyrum er lék at handsöxum, ok váru sjau senn á lopti. Sá spurði hann fyrri at nafni. Hann nefndisk Gangleri ok kominn af rifils stigum, ok spyrr hverr höllina átti. Hann segir at sá var konungr þeira, "ok mun ek fylgja þér at sjá hann". Þar sá hann margar hallir ok mörg gólf ok margt fólk. Sumir drukku, en sumir léku. Þá mælti Gangleri, er honum þótti þar margt ótrúligt:
- 2. Skatnar allir
- áðr en gangim fram
- um skygnask skyli,
- því at óvíst er vita
- hvar óvinir
- sitja á fletjum fyrir.
Hann sá þrjú hásæti ok hvert upp af öðru, ok sátu þar maðr í hverju. Þá spurði hann hvert nafn höfðingja þeira væri. Sá sagði er hann leiddi inn: "Sá er í neðsta sæti sitr er konungr ok heitir Hár, ok þar næst Jafnhár, en sá er efstr er heitir Þriði." Hann spyrr Ganglera hvat fleira væri eyrinda, en heimill er matr ok drykkr. Gangleri segir at fyrst vill hann spyrja ef nökkurr er fróðr maðr inni. Hár segir at hann komi eigi heill út ef hann er fróðari,
- 3. ok stattu fram
- meðan þú fregn,
- sitja skal sá er segir.
