Hugbúnaðarverkfræði
Úr Wikipediu, frjálsa alfræðiritinu
Hugbúnaðarverkfræði snýst um að búa til hugbúnað og viðhalda honum. Allar nánari skilgreingar eru umdeildar, en hér eru nokkrar þeirra:
- "Að finna og nota traustar verkfræðilegar aðferðir til að búa til áreiðanlegan hugbúnað á hagkvæman hátt." [Bauer 1972]
- "Hugbúnaðarverkfræði er sú grein verkfræðinnar sem beitir aðferðum tölvunarfræði og stærðfræði til að ná fram hagkvæmum hugbúnaðarlausnum." [CMU/SEI-90-TR-003]
- "Að rannsaka og nota kerfisbundnar, agaðar og mælanlegar aðferðir við þróun, rekstur og viðhald hugbúnaðarlausna." [IEEE 1990]
[breyta] Munurinn á hugbúnaðarverkfræði og tölvunarfræði
Í atvinnulífinu er yfirleitt ekki gerður greinamunur á starfssviði hugbúnaðarverkfræðinga og tölvunarfræðinga og það er ekki mikill munur á náminu. Tölvunarfræði sem fræðigrein snýst um hvernig er hægt að leysa tiltekið vandamál með hjálp tölvu en hugbúnaðarverkfræði sem fræðigrein snýst um hvernig á að standa að hugbúnaðarþróun til að framleiða góðan hugbúnað á sem hagkvæmastan hátt.
[breyta] Nám á Íslandi
Hugbúnaðarverkfræði er kennd á Íslandi bæði við Háskóla Íslands (frá 2001) og Háskóla Reykjavíkur (frá 2006).
Hvað er kennt? Það getur verið erfitt að skilgreina muninn á hugbúnaðarverkfræðingum og tölvunarfræðingum. Á Íslandi læra nemar í hugbúnaðarverkfræði að beita öguðum aðferðum á úrlausnarverkefni. Þessar aðferðir eru frá greinum stærðfræði (stærðfræðigreining, tölfræði, línuleg algebra), stjórnunar og reksturs (hagverkfræði, rekstrarfræði, verkefnastjórnun), gæðastjórnunar (hugbúnaðarprófanir, iðnaðartölfræði) og síðast en ekki síst tölvunarfræði (þróun hugbúnaðar, forritunarmál, almenn tölvunarfræði, uppbygging tölvunnar og stýrikerfa, netafræði og reiknirit).
Kröfur til þess að vera hugbúnaðarverkfræðingur Hugbúnaðarverkfræðingur getur sá kallað sig sem hefur fengið það samþykkt frá Verkfræðingafélagi Íslands. Til þess þarf að vera með mastersgráðu í hugbúnaðarverkfræði. Mastersnám tekur 2 ár, en fyrst þarf að ljúka B.S. námi sem tekur 3 ár.
