Kleppsspítali

Úr Wikipediu, frjálsa alfræðiritinu

Landspítali Kleppi, áður Kleppsspítali, er geðspítali sem tilheyrir geðsviði Landspítala - háskólasjúkrahúss. Hann er oft í daglegu máli nefndur Kleppur.

Kleppsspítali, aðalbygging frá árinu 1907

Fyrstu lög um Kleppsspítala voru nr. 33/1905, samþykkt af konungi þann 20. október 1905 (frumvarp um stofnun Kleppsspítala var þó innlent fyrirbæri) og var spítalinn opnaður árið 1907. Kleppsspítali var fyrsta sjúkrastofnunin sem var reist og rekin alfarið af landsjóði. Markmið stofnunarinnar var að létta miklum vanda af heimilum geðsjúkra og búa geðsjúkum mannsæmandi aðbúnað og gæslu, frekar en að stunda eiginlegar lækningar. Upprunalega var pláss fyrir 50 sjúklinga, og þurftu aðstandendur að borga með sjúklingum, ýmist 50 aura eða 1 krónu á dag, eftir aðstæðum. Yfirstjórn spítalans samanstóð af landlækni og aðila sem stjórnarráðið skipaði.

Kleppsspítali, bakhlið aðalbyggingarinnar

Sem fyrr segir var vandi geðsjúkra og aðstandaenda þeirra mikill á þeim tíma er Kleppsspítali var stofnaður. Einnig var farið illa með geðsjúka og lífsskilyrði þeirra voru enganveginn á við þau sem heilbrigðir höfðu. Árið 1901 var gerð úttekt á hversu margir væru geðsjúkir í landinu (samkvæmt þess tíma skilgreiningu) og reyndust þeir 133, þar af 124 sem voru á sveit. Árið 1880 reyndust geðsjúkir vera 81, var því um mikla fjölgun að ræða á þessum rúmu tveimur áratugum.

Spítalinn breytti miklu, þó að hann gæti ekki tekið alla inn sem þurftu, og lét Guðmundur Björnsson þau orð falla á Alþingi um þremur mánuðum eftir opnun spítalans, að sjúkrahúsið hefði „getið sjer þann orðstír, að það sje einhver gagnlegasta stofnun þessa lands“.

Starfsemin í dag er gerbreytt með breyttum áherslum og tilkomu nýrra og betri meðferðarúrræða. Í dag eru reknar nokkrar deildir á Kleppsspítala, starfsemi þeirra felst aðallega í endurhæfingu, að veita þeim meðferð sem eiga við geðklofa að stríða eða eru taldir vera að veikjast af geðklofa og einnig veita framhaldsmeðferð fyrir þá sem hafa strítt við geðklofa, að hjúkra þeim sem eru langtíma geðfatlaðir og líkamlega fatlaðir og að veita þeim meðferð sem eru alvarlega geðsjúkir og hafa takmarkað sjúkdómsinnsæi og þiggja ekki meðferð sjálfviljugir. Fjöldi deilda á Kleppsspítala er sex, sumar dagdeildir en aðrar göngudeildir.

[breyta] Myndir

Myndirnar eru af Kleppsspítalasvæðinu, teknar í mars 2006.

Kleppsspítali, aðalbygging, tekið úr garðinum	Kleppsspítali	Kleppsspítali	Kleppsspítali, aðalbygging
Kleppsspítali, skrifstofur og móttaka í forgrunni, aðalbyggingin í bakgrunni	Kleppsspítali, íbúðarhús sem standa á lóðinni	Kleppsspítali, eitt íbúðarhúsanna á lóðinni	Kleppsspítali, samkomusalur, iðjuþjálfun
Kleppsspítali, málningarverkstæði	Kleppsspítali, málningarverkstæði	Kleppsspítali, pípulagningarverkstæði