Reykjavíkurflugvöllur
Úr Wikipediu, frjálsa alfræðiritinu
Reykjavíkurflugvöllur er flugvöllur í Vatnsmýri í Reykjavík. Flugrekstur hófst þar árið 1919 við mjög frumstæðar aðstæður. Bretar gerðu svo varanlegan flugvöll þar í Síðari heimsstyrjöld sem Íslendingar fengu full yfirráð yfir í stríðslok. Innanlandsflug hefur síðan þá haft miðstöð sína á vellinum og einnig gerðu Loftleiðir út þaðan til 1962 en þá var farið að nota Keflavíkurflugvöll fyrir millilandaflug.
Árið 2002 fóru 325.207 flugfarþegar um völlinn, mest í innanlandsflugi en einnig til Grænlands og Færeyja.
Lengi hafa staðið nokkrar deilur um flugvöllinn og staðsetningu hans. Andstæðingar hans benda á mikla nálægð við byggð og víðáttumikið byggingarlandið sem fer undir völlinn. Fylgismenn vallarins segja hann vera stóran vinnustað og nauðsynlegan til þess að Reykjavík geti sinnt sínu hlutverki sem höfuðborg landsins. Flugvöllurinn er á aðalskipulagi Reykjavíkurborgar til 2016 en framhaldið eftir það er óljóst. Þann 17. mars 2001 var haldin atkvæðagreiðsla í Reykjavík um framtíð flugvallarins. Þátttakan var dræm, 37,2% af kjörbærum Reykvíkingum tóku þátt. 49,3% vildu flugvöllinn burt en 48,1% vildu hafa hann áfram í Vatnsmýrinni, 2,6% atkvæða voru auð eða ógild. Niðurstöður atkvæðagreiðslunnar voru ekki bindandi fyrir borgaryfirvöld.
