ჯიმშელაძე, პავლე

ვიკიპედიიდან

პალიკო ჯიმშელაძე, ბორჯღალოსანთაგან პირველმა მოიხვეჭა 50-ე კეპი!

პავლე ჯიმშელაძე (08.07.1975, რუსთავი) - ქართველი მორაგბე , შუამარბი, 10 ნომერი.

საქართველოს ნაკრებში ჩაატარა ყველაზე მეტი მატჩი (53) და მოაგროვა ყველაზე მეტი ქულა 304 (8ლ 57გ 47ს 3ა) .

ტანად 180 სანტიმეტრია და 88 კილოს იწონის. რაგბამდე ჭიდაობდა. თამაში 16 წლისამ დაიწყო. პირველ მწურთნელად საშა ლობჟანიძე ჰყავდა, შემდეგ კი დავით კაკაბაძე და გურამ მოდებაძე.

1994 წელს საფრანგეთში იასპარეზა ჭაბუკთა მსოფლიო თასზე. საქართველოს ორგზის ჩემპიონია რუსთავის ხარებში 1993/4 და თბილისის გუმარში 1996. მერე, ბორჯღალოსანთა მასობრივი ემიგრაციის პირველივე ტაღლის დროს, გადავიდა საფრანგეთში, სადაც ორი სეზონი კასტრში გაატარა, თითო გრენობლსა და ორიაკში, ბოლო სამი კი ბობინში.

კაცთა ნაკრებში 1995 წლიდან რეგულარულად თამაშობს. 2001 წელს არგენტინაში იჩაუქა შვიდკაცას მსოფლიო თასზე, 2003 წელს კი ავსტრალიაში დიდი რაგბის მსოფლიო თასზეც იბურთავა(4 მატჩი, 23 ქულა). 2001 წელს რუმინეთის ძლევით ერთა თასი მოიგო(5 მატჩი, 54 ქულა) , 2005 წელს კი, იმავე მეტოქის ჯობნით, ანთიმოზის თასი.

თავიდან უკანა ბეკი იყო, მერე შუა, 1999 წლიდან კი დამწყები 10 ნომერია. 2000 წლიდან ხშირად დაკისრებია კიკერობა და საქმისთვის ჩინებულად გაურთმევია თავი. ძალზედ მაგარია დაცვაში, მეტადრე კი ბოჭვაზე, კეპებისა და ქულათა სიმრავლით კი ბორჯღალოსნებში კარგა ხანია ბადალი არა ჰყავს.