Ambrosius Theodosius Macrobius
E Vicipaedia
Ambrosius Theodosius Macrobius saeculo quarto exeunte quinto ineunte Romae vixit. Unus e principibus civitatis litterarum studio clarus factus est. Scripsit enim Saturnalia quorum maxima pars adhuc extat de Vergilii poetae laudibus, necnon de iocis aut moribus veterum. Multa etiam de Calendario Romano inibi ac de cultu deorum meminit necnon de cibatu potuque salubri vel noxio. Materiam huius operis ex Varrone et Aulo gellio (Aulus Gellius) et Plutarcho praecipue sumpsit, sed convivialem sermonem induxit cui praestantes homines Avienus, Praetextatus, Servius grammaticus, aliique multi interfuerunt. Extant etiam Commentarii in Somnium Scipionis e Ciceronis de Republica excerptum et a Macrobio nobis ab iniuria temporis vindicatum.
Scriptis suis Macrobius religionem majorum servare frustra conatus est eo tempore quo imperatores Romani jamdudum Christiani facti essent. Itaque in praeteritis versatur rebus, non in praesentibus. De Christianis autem numquam aperte loquitur sed, ut imperator Julianus Apostata aliquot ante annis, vult monstrare antiquos deos sub diversis appellationibus unum fuisse numen et priscam religionem homines ad altissima honestissimaque perducere posse et Aeneidem Vergilii ad pueros instituendos potiorem esse Biblia christianorum. Serius...
