Banneux
Van Wikipedia
Dit artikel is gesjreve in 't Valkebergs. 't Weurt gewaardeerd óm in dit artikel 't Valkebergs aan te hauwe of aan te gaeve welk anger dialek gebroek is.
Banneux (ouch waal Banneux Notre-Dame) ies 'n dörp in de gemeinte Sprimont in de Belzje provincie Luuk. 't Liek tösje Luuk en Sjpa.
Banneux ies 'n bekènd baevaartsoord. Tösje 15 januari en 2 mièrt 1933 zou Maria hie ach kièr versjene zin aan de twelfjaorige Mariette Beco. Maria zou ziech doe Vierge des Pauvres ("Maag van de erm luuj") geneump höbbe. Ouch zou zie um 'n kapel gevraog höbbe; dees woort nog in 'tzelfde jaor geboewd op de plaats van de versjieninge, de veurtuin van 't hoes van de familie Beco. Vanaaf 1948 boewde me aan 'n basiliek. In 1949 woorte de versjieninge erkènd door biesjop Louis-Joseph Kerkhofs van 't Biesdom Luuk. De erkènning door 't Vaticaan volgde in 1952.
Banneux greujde oet tot e drökbezoch baevaartsoord. Jaorliks kómme hie óngevaer 400.000 pelgrims naotoe. Ouch vanoet Nederlands en Belsj Limburg goont väöl luuj d'r heen. In Banneux ies ouch 'n brón die geneeskrachtig zou zin en die door Maria aan Mariette getuènd zou zin. In 1985 woort 't dörp bezoch door paus Johannes Paulus II.
