Calvarie
Van Wikipedia
Dit artikel is gesjreve in 't Valkebergs. 't Weurt gewaardeerd óm in dit artikel 't Valkebergs aan te hauwe of aan te gaeve welk anger dialek gebroek is.
Calvarie (woord oet 't Latien), of triomfkruus ies 'n twiè- of driedimensionaal aafbeelding van Jezus aan 't kruus mèt aan beids kènt de treurende Maria en Sint Jan (Johannes). Sóms sjtoon d'r nóg twiè kruzer neve van twiè ander martelaere, die gehange zint gewore. Ouch Maria Magdalena, volgelinge van Jezus, weurt sóms bie 't tafereel aafgebeeld. In de kèrk ies 't kruusbeeld opgesjtèld op 't doksaal of hingk (of sjteit op de triomfbalk) op de grens van sjeep en koar ónder de triomfbaog. Diet ies de ièrebaog van de triomferende Christus.
In Oud-Valkeberg bevingk ziech op 'ne driesjprunk mèt 'n brök euver de Geul 'n calvarie besjtaonde oet 'n houte kruus mèt kruusbeeld geflankeerd door groate beelde in klein mergele kapelkes mèt topversering: Slevevrouw en Sint Jan (1739).
In Moresnet-Chapelle, de baevaartsplek Eikske, bevingk ziech 'ne groate calvarie in 'n kruusweegpark oet 1903.
In de kruusweeg beeldt de 12e sjtasie 't zelfde oet es de calvarie.
