Ammit
Us der alemannische Wikipedia, der freie Dialäkt-Enzyklopedy
D Ammit isch ä Demon in dr altägyptische Mythologii gsi. Si het dr Chopf vom enä Chrokodil, dr Vorderkörper vom enä Leu und s Hinderdeil vom enä Flusspfärd gha. Abbildige vo dr Ammit git s im Dotebuech. D Ammit het ä wichtigi Rolle bim Dotegricht gschbilt. S Härz vom Dote isch gwooge worde und wenn s schwerer gsi isch as d Fädere vo dr Göttin Maat, denn het d Ammit s Härz ufgfrässe. Drmit isch dr Dot verlore gsi und het si Wäg zur Vergöttligung nid chönne adräte.
