Anwil

Us der alemannische Wikipedia, der freie Dialäkt-Enzyklopedy

Wappe

Basisdate
Kanton:	Basel-Landschaft
Bezirk:	Sissech
BFS-Nr.:	2841
PLZ:	4469
Koordinate:	47° 27' n. Br. 7° 56' ö. L.
Höchi:	600 m ü. M.
Flächi:	3.96 km²
Iwohner:	541 (31. Dezember 2005)
Websyte:	www.anwil.ch
Charte

Technische Yschränkung:
Dr koräkt Titel wär: »Ammel«

Dialäkt: Baseldytsch

Ammel (hochdytsch Anwil) isch e politischi Gmeind im Bezirk Sissech vom Kanton Basel-Landschaft in dr Schwiiz.

Idylle z'Ammel

[ändere] Lag

Ammel ligt uff 600 m.ü.M. inere Mulde vom Tafeljura. Es isch die öschtligschti Gmeind vom Baselbiet. Sini Nochbergmeinde sin Oltige, Wäislinge und Roteflueh plus d Aargauer Gmeind Wittnau und s soledurnische Gemeinde Chienbärg.

S Dorf wird vo Gälterchindä us per Poschtauti erschlosse

[ändere] Wappe

Als eis vo de wenige Baselbieter Wappe isch s Ammeler Wappe sträng geometrisch: E goldige Querstreife und drunter links e schwarzi und rächts e silbrige Helfti. S goldige Schildhaupt dyttet uff die ehemoolig Herrschaft vo dr Homburg hi unds Schwarz bzw. Silber erinnere an d Stadt Basel bzw. d Herre vo Chienbärg.

[ändere] Gschicht

Ammel isch 1276 als Weiler des Arno s'erschti Moll inere Urkunde uftaucht. Im Mittelalter ischs Dorf im Bsitz vo de Grafe vo dr alte Homburg gsi. Vo 1400 bis 1534 isches schrittwys an d Stadt Basel ybere gange. Bis 1801 isch Ammel e wichtige Zollort gsi, wills diräkt an dozemol no öschtriichische (habsburgische) Aargau gränzt hett. Bi dr Kantonstrennig hett Ammel mit Härzbluet de Stadtbasler d Stange ghalte. Wo die aber verlore hän, hän sich d Ammeler de Baselbieter miesse aschliesse. Vo däm här isches fascht es bizzeli en Hohn, wenn im Baselbieterlied - dr inoffizielle Hymne vom Kanton - die erschti Strophe mit "Vo Schönebuech bis Ammel" afoht. Das hett zwar geografischi Gründ (Ammel isch die öschtliggsti Gmeind, entbehrt abr trotzdäm nid enere geisse Ironii.