Carl Gustav Jung

Us der alemannische Wikipedia, der freie Dialäkt-Enzyklopedy

De Carl Gustav Jung (* 26. Juli 1875 z Chesswil; † 6. Juni 1961 z Chüsnacht) isch en schwizer Mediziner und Psycholog gsii. Er isch de Bigründer vo de Analytische Psychologii.

[ändere] sis Lebe

De Jung isch 1875 as de Soo vomene Pfarrer im thurgauische Chesswil uf d Welt cho. No woner e Chliichind gsii isch, isch sini Famili uf Laufe züglet. Er isch dai i d Schuel und den z Basel is Gymi. Vo 1894 bis 1900 het er a de Uni Basel Medizin studiert und sich em Endi vo de Studieziit uf di psychiatrischi Mediziin spezialisiert. 1900 isch er Assistent im Burghölzli, de Psychiatrische Klinik vo de Uni Züri wore, wo ner 1902 mit de Schrift Zur Psychologie und Pathologie sogenannter occulter Phänomene dissertiert het. 1903 het er d Emma Rauschenbach ghüroote.

Im Joor 1905 het er denn z Paris bim Pierre Janet mit diagnostische Assoziationsstudie habilitiert. Noch dem er 1906 em Sigmund Freud ersti Brief gschribe gha het, isch er dem 1907 z Wien z erschtmol bigegnet und het denn bi nem afange schaffe, nochdem er mitem Pierre Janet Striit öbercho het. 1909 het de Jung sini aigni Praxis im zörcherische Chüsnacht uftue. De Jung isch vo 1910 bis 1914 de Präsident vo de Internationale Psychoanalytische Verainigung gsi. Won er 1912 sis Buech Wandlungen und Symbole der Libido usebrocht het, het er Striit mitem Freud öbercho, well er i dem Buech em Freud sini Libidotheorii kritisiert het.

Vor alem i de Zwanzgerjoor isch de Jung zimli fill graist und het Nordafrika, Kenia, New Mexico bsuecht, woner au indigeni Völker und Kulture undersuecht het. Z Indie het en di östlichi Philosophi bigaisteret und er het afange sich mit em Thema Spiritualität, Alltagslebe und Unbiwusstsii usenandersetze.

1933 het er a de ETH Züri d Lehrtätigkait wider ufgnoo und isch zwai Joor spöter Titularprofesser worde. Scho vo Afang aa, het sich de Jung dütli vo de Nazi z Tütschland abgsetzt ghaa. Ab 1944 isch er Professer z Basel gsi. 1955 isch em Jung sini Frau gstorbe; er het vo ere füf Chinder öbercho. De Jung isch aber au bikannt gsii dur sini Liebschafte mit Patientine, allne vorane mit de Sabina Spielrein und de Toni (Antonia) Wolff.

I sine letzte Joore het de Jung sich stärcher a de Erforschig vo sinere Theorii vom kollektive Biwusstsii zugewendet und het sich mit de Bidütig vo de Religio för d Psyche usenandergsetzt. 1961 isch er denn z Chüsnacht gstorbe.