ConSol

Us der alemannische Wikipedia, der freie Dialäkt-Enzyklopedy

D’ConSol isch en soziali Inschtitution und es marktwirtschaftlich uusgrichtetes Unternähme in eim.

Als soziali Inschtitution het d’ConSol de Uuftrag, im Kanton Zug möglichscht vill Arbeitsplätz für Mänsche mit physische oder psychische Erwärbsbehinderige z’schaffe. Zuedäm führt d’ConSol Uusbildige und Umschuelige im Uuftrag vo de IV (Invalideversicherig) dure.

Als Unternähme verfolgt d’ConSol ds Ziel, sich zumene grosse Teil sälber z’finanziere, indäm si chundeorientierti Produkt härschtellt und qualifizierti, professionelli Dienschtleischtige uf em freie Markt aabütet und verchauft.

D’ConSol isch en gmeinnützige Verein mit Sitz in Zug und unterhaltet vier verschiednigi Betriebsschtätte.

Inhaltsverzeichnis 1 D’Betriebsschtätte 2 Uufgabe 3 Zielgruppe und Lohn 4 Zwäck gemäss de Schtatute 5 Finanzierig 6 Gründig und Rächtsform 7 Organisation 8 Weblinks

[ändere] D’Betriebsschtätte

D’ConSol isch i die 4 folgende Bereich uufteilt. All die befinded sich entlang em Zuger Ibelwäg, verteilt uf drüü Gebäude.

• ConSol GLAS schtellt us Altglas dur Schliiffe und Sandschtrahle Trinkgleser, Windliechter und Schale här. (ca. 20 Mitarbeiter)

• ConSol PAPIER produziert handgschöpfts Papier und da drus Grusscharte, Fotoalbe, Geschtebüecher, Agände… (ca. 15 Mitarbeiter, im gliche Gebäude wie d’“ConSol GLAS“)

• ConSol OFFICE isch es Bürozentrum, wo für Firme und Privatpersone Uuftragsarbeite uusfüehrt: Mailings, Telefondienscht, Dias iiscanne, CDs/DVDs kopiere, Debitore- und Kreditorebuchhaltig, Vorverchauf vo Konsärt-Iitrittscharte uvm. (ca. 25 Mitarbeiter, im Jahr 2002 g’gründet)

• ConSol BISTRO isch es Personal- und Quartierrestaurant, wo au vo Aagschtellti vo umligende Firme bsuecht wärde cha. Es git nur Zmorge und eis Mittagsmenü pro Tag, ds Menü aber meischtens i zwei Versione: mit Fleisch und vegetarisch.

(E füüfte Bereich, nämlich „ConSol TEXTIL“, isch planet. Äbefalls im Entschtah isch en Uusbau vom „ConSol OFFICE“, wo zuekünftig öppe topplet so vili Mitarbeiter beschäftige chönne söll.)

[ändere] Uufgabe

D’Chärnuufgab vo de ConSol beschtaht drin, gschützti Arbeitsplätz für erwärbsbehinderti Mänschen z’schaffe.

D’ConSol füehrt unter anderem „Uusbildunge“ sowie „Umschuelige“ im Uuftrag vo de IV (Invalideversicherig) dure. D’Inschtitution übernimmt einersiits drümonatigi „IV-Abklärige“, wo de Grad vo de „Arbeits- und Leischtigsfähigkeit“ vo de versicherte Person ermittlet wärde söll, anderersiits beschäftiget sie mänge (z.T. au abgklärti) Mitarbeiter uf unbefrischteti Duur (wiiter).

Äs sind au sächsmonatigi „Arbeitstrainings“ möglich: D’Arbeitsfähigkeit, Belaschtbarkeit, Teamfähigkeit und Leischtigsfähigkeit (i Quantität und Qualität) wärded trainiert, Ziel isch d’„Wiederiingliederig in offne Arbeitsmarkt“.

Au süscht versuecht d’Inschtitution, möglichscht vill g’eigneti Mitarbeiter i de Privatwirtschaft unterzbringe. Es wärded defür jewils imene erschte Schritt „Schnupper-Praktikas“ i de defür aagfragte Betriebe vermittlet und – au dört - gegäbnigefalls „IV-finanzierti Duuerpraktikas“ duregfüehrt, wo im beschte Fall zur definitive Aaschtellig füehred.

Es wärded au „Lehrschtelle“ aabote und Zivildienstleischtendi chönd i de ConSol ihre „Zivildienst-Einsatz“ absolviere.

[ändere] Zielgruppe und Lohn

D’Zielgruppe sind im Kanton Zug wohnhafti Persone, jedoch chönd au vo de IV-Stelle vo anderne Kantön di nötige IV-Verfüegige uusgschtellt wärde. Die Verfüegige müend entweder bereits gschproche, oder mindischtens gsicheret in Uussicht schtehend sii, demit öpper id ConSol uufgnoh wärde cha. D’Bewerber müend uusserdäm freywillig und regelmässig mindischtens 20 Schtunde i de ConSol schaffe wölle, und töfed unter keinere akute Suchtproblematik oder schtarchen geischtige Behinderung liiden. Es mues en ei- bis zweiwöchigi unbezahlti Schnupperzyt absolviert wärde.

D’Aufnahmekriterien variiered vo Teilbetrieb zu Teilbetrieb: Für d’Betriebsschtätt „Office“ wird en kaufmännischi Uusbildung vorusgsetzt, für d’Betriebsstätte „Bistro“ d’Iihaltig vo Hygienevorschrifte und für d’Betriebsschtätte „Glas“ und „Papier“ handwärchlichs Gschick.

Unbefrischtet aagschtellti Mitarbeiter bechömed zuesätzlich zum IV-Gäld einen individuell feschtgleite Leischtigslohn. Di meischten Mitarbeiter schaffid Teilzyt. Obwohl mängi Arbeitsplätz uf die Art topplet beleit wärde chönd, sind i de Regel alli Plätz uusbuechet und es wird für neui Bewärber en Wartelischte gfüehrt.

[ändere] Zwäck gemäss de Schtatute

• 1. De Verein förderet, dass Mänsche mit Behinderig id Gesellschaft integriert und in freie Arbeitsmarkt wiederiigliederet wärded.

• 2. De Verein bezwäckt d’Schaffig vo Arbeitsplätz für Mänsche mit Behinderig, zum ihne Verdienschtmöglichkeite büüte.

• 3. I de Arbeitsprojekt chönd au nid-behinderti Erwerbslosi beschäftiget wärde, sowit’s d’Regelige vom BSV zuelond.

• 4. De Verein cha mit anderne Iirichtige, wo au für d’Wiederigliedig vo Behinderte sind, Kooperatione iingah.

[ändere] Finanzierig

D’ConSol wird nach betriebswirtschaftliche Grundsätz und mit marktwirtschaftlicher Uusrichtig gfüert. Die zur Verfüegig gschtellte Mittel wärded wirkigsorientiert und ökonomisch bruucht. En uusglichni Jahresrächnig söll dur de Verchaufserlös, Byträg vo de schtaatliche und kantonale öffentliche Hand, sowie dur Schpände erreicht wärde.

[ändere] Gründig und Rächtsform

Will de Leischtigsdruck i de Privatwirtschaft schtarch zuegnoh het, isch de Bedarf nach gschützte Arbeitsplätz für Mänsche mit Erwerbsbehinderig aagschtige. 1999 isch d’Consol als gmeinnützige Verein und mit Sitz Zug gründet worde, mit de aktive Hilf vo der „Direktion des Innern des Kantons Zug“

[ändere] Organisation

• Mitgliderversammlig
• D’Mitgliderversammlig vom Verein „ConSol“
  • Vorschtand
  • Käty Hofer, dipl.Ing.ETH (Präsidentin)
  • Karl Abegg, dipl. Bruefsberater (Vizepräsident)
  • Alfons Croci, Kommunikationsberater (Bereich Kommunikation)
  • Jean Baptiste Huber, Rächtsaawalt und Notar (Aktuar)
  • Yvonne Wyss, Projektberaterin (Kassiererin)
  • Barbara Hotz, Kantonals Sozialamt (beratendi Schtimm)
    • Gschäftschtell
    • Mathys Wild (Gschäftsfüerer)
    • Manuela Duss (Assischtäntin vo de Gschäftsleitig)
    • Walter Moser (Sekretariat)
      • Glas
      • Hansjörg Sarbach (Betriebsleiter)
      • Sara Weinberger (Gruppeleiterin)
      • Papier
      • Cécile Schneider (Betriebsleiterin)
      • Marianne Peter (Gruppeleiterin)
      • Lieni Lienhard (Gruppeleiter)
      • Office
      • Eugen Staub (Betriebsleiter)
      • Ruth Landis (Gruppeleiterin)
      • Jasmin Lüchinger (Gruppeleiterin)
      • Susanne Wyss (Gruppeleiterin Uusbildig)
      • Christopher Prinz (Schpringer)
      • Bistro
      • Claire Brunner-Häfliger (Betriebsleiterin)
      • Christa Ganzmann (Leiterin Chuchi)

[ändere] Weblinks

• die offiziell Siite vo de ConSol
• de „Curaviva“-Onlineshop, wo au ConCol-Produkte aabütet
• Trendlife, en Wiederverchäufer
• Caritas, en Wiederverchäuferin
• Mosaiko, en Wiederverchäufer
• Fuerrer, en Wiederverchäufer
• Claro, en Wiederverchäufer
• de Claro-Wältlade über d’ConSol
• Ds ConSol BISTRO im rauchfreye Restaurantverzeichnis