Fasnachtsclique
Us der alemannische Wikipedia, der freie Dialäkt-Enzyklopedy
 |
Dialäkt: Baseldytsch |
E Fasnachtsclique (viilmools kurz Clique aber au Fasnachtsgesellschaft gnennt) isch e Drummel- und Pfyffergrubbe wo an dr Basler Fasnacht mitmacht.
Fasnachtsclique wird ainersiits die musizierendi Formation, aber anderersiits au dr gsammti Verain gnennt.
Inhaltsverzeichnis |
[ändere] Formation
D' Formation vo-n-ere Fasnachtsclique bestooht (vo Vorne zum Ändi) Vortrab, Pfyffer, Tambourmajor und Tamboure, wobii die eksaggti Raihefolg amme e bitz variert. D' Clique spielt an de drey scheenschte Dääg, verklaidet in fantasievolle Goschdyym und Larve uff Ihrne Drummle und Piccolos traditionelli Fasnachtsmärsch.
[ändere] Vortrab
Dr Vortrab sorgt immer fyr gniegend Platz auf dr Marschroute und präsentiert au s' Sujet vo dr Clique miteme auf Reeder montierte Requisit, ere kunschtvoll bemoolte Laterne und vertailt Zeedel wo uff baseldytsch satirischi und amme sarkastischi Vers uffdruggt sinn wo s' Sujet witter beschriibe. Immer weniger wärde im Vortrab Vorriter ygesetzt wo hoch uff de Ross voruss ritte. Mängmool trifft me-n-aber stattdesse es Junteressli us Holz oder e Stäggeressli ah.
[ändere] Spiel
D' Pfyffer, dr Tambourmajor und d' Tamboure bilde s' Spiel. Je noch Greesi und Tradition wäggselt d' Reihenfolge vo de drey Untergruppene in dr Formation. Hyffigschti Variante sinn P-TM-T und TM-T-P.
Usserdäm trifft me sehr oft au uff reini Tambouren- oder Pfyffergruppene. S' Inschtrumänt vo de Pfyffer isch s Piccolo. D Tamboure (au Drummler) spiele uff ere Basler Drummle uss Metall oder Holz.
[ändere] Verain
Fasnachtsclique hänn meischtens mehreri Formatione wo an der Fasnacht lauffe. D' Gruppe sinn meischt noch Alter und mängisch au nochem Geschlecht trennt. Einigi Clique verbiete gar d' Migliedschaft vo aim Geschlecht in Ihrne Statute. Ybligi Gruppe sinn Binggis (Kinder ab ca. 8 Joohr), Jungi Garde (Jugendliggi 12-18 Joohr), Stammverain (ab 18 Joohr) und Alti Garde (fyr Mitglieder wo nymm die zygigi Gangart vom Stammvereins wänn lauffe). Vieli Verain bilde ihre Noochwuggs in aigne Drummel- und Pfyfferschule uss. Es baar Clique biete-n-au Erwaggsenekyrs ah.
[ändere] Bekannti Clique
Die älteschti no eggsischtierendi Fasnachtsgsellschaft isch d' VKB, die Vereinigte Glaibasler vo 1884 mit Sitz, genau, im Glaibasel. Die zwaitälteschti Clique isch d' Breo-Clique 1896 uss em Grossbasel. An dr Basler Fasnacht 2007 sinn total 225 Tambouren- und/oder Pfyfferformatione aagemäldet gsi.[1]
