Jubla

Us der alemannische Wikipedia, der freie Dialäkt-Enzyklopedy

Jubla isch dr Name vo de zwei rechtlich selbschtändige, aber eng zämearbeitende römisch-katholische Chinder- und Jugendverbänd Jungwacht und Blauring i dr düütschschprachige Schwiiz. D Jungwacht isch für Buebe und dr Blauring für Maitli zueschtändig. I dr Öffentlichkeit werded beidi Verbänd hüt i dr Regel als ein gmeinsame Verband under dr Bezeichnig Jubla (Jungwacht + Blauring) wahrgnaa. Beidi Verbänd händ sich im Zuug vo dr Ökumene au gegenüber andere Konfessione göffnet. Zäme bringed Jungwacht und Blauring d Verbandsziitschrift ideejubla use.

[ändere] Gschicht

Ihri Urschprüng händ Jungwacht und Blauring i dr katholische Jugendbewegig nach em Erschte Weltchrieg.

[ändere] Jungwacht

Im Jahr 1932 isch dr Schwiizerischi Jungwachtbund als Vorschtufe zum bereits 1893 gründete Schweizerische Katholische Jungmannschaftsverband (SKJV) gschaffe worde. Uf dr Verbandsfüehrertagig vom SKJV am 11. und 12. September vo dem Jahr isch vorgschlage worde, i dr Jungwacht di bereits a viilne Orte innerhalb vo dr düütschsprachige Schwiiz entschtandene katholische Gruppe vo junge Burschte zämezschlüüsse. Namensgeber für de neu Bund isch d Jungwacht Birsfelde worde, wo in Birsfelde bi Basel entschtande isch, wo au für di äusseri Erschiinig vom Jungwachtbund mit siim grüene Hemd mit em schtilisierte Chrischtuszeiche prägend worde isch.

[ändere] Blauring

D Gründig vom Blauring gaht uf e Versammlig am 17. September 1933 zrugg. Als Chinderschtufe vo dr damalige Jungfraue-Kongregation plant, sind bi dr Zämekunft d Grundlinie vom neu gschaffene Verband feschtgleit worde. Dr Name Blauring hät debii einersiits s Wiibliche (vo dr katholische Mueter Gottes, Maria, ihre wird d Farb blau zuegordnet) und anderersiits d Gmeinschaft (Ring) symbolisiert.

[ändere] Jubla

Sit de 1970er Jahre schaffed beidi Verbänd eng zäme. Uf Grund vo de gsellschaftliche Umbrüch vo dr Ziit, wo auch i dr Chile ihri Würkig entfalteted, händ si sich vo ihrne beide Gründerverbänd glöst. Als Jubla händ si sich vo volkschilchlich orientierte Verbänd zu Chinderorganisatione entwicklet, wo nebed em Aagebot a christlich prägter Freiziitkultur au gsellschaftlichi Zielsetzige verwürkliche wänd.

[ändere] Verbandsstruktur

[ändere] Gruppe und Schare

D Arbet mit de Chind findet vor Ort i de Pfarreie schtatt, wo die in Gruppe und Schare organisiert sind. D Gruppe, wo öppe fünf bis 15 Chind umfassed, chömmed regelmässig im Ein- bis Zwei-Wuche-Rhythmus zu Treffe (Gruppeschtund) zäme. Deet wird gmeinsam gschpielt, gwercht, Theater gschpielt oder e Viilzahl a andere Aktivitäte duregfüehrt.

Trotz dr enge Zämearbet zwüsched Jungwacht und Blauring werded uf dere underschte Ebeni vo dr Verbandstätigkeit i dr Regel d Gruppe nach Gschlechter trennt. Es beschtönd allerdings au vereinzelt gmischti Gruppe. Vor allem bi Jugendliche ab 14 Jahr, wo in sogenannte "15er-Teams" oder dr "Plattform Jugend" zämegfasst sind, findet kei Gschlechtertrennig schtatt. D Betreuig vo de Gruppe liit i de Händ vo ältere Jugendliche zwüsched 16 und 25 Jahre. Je ein bis zwei von ihne leited e Gruppe.

E Schar beschtaht us allne Gruppe vonere Pfarrei. Auch d Schare werded oftmals no nach Maitli und Buebe underteilt, so dass es hüüfig Pfarreie mit ere Jungwacht-Schar und ere Blauring-Schar git. Allerdings gits au gmeinsami Schare, und neu entstehendi werded hüt fascht uusschliesslich als gmischtgschlechtlichi Jubla-Schare ggründet. A dr Schpitze schtaht d Scharleitig, wo grösseri Veraaschtaltige wie biischpiilswiis Ferielager organisiert. E wichtigi Funktion hät au dr Präses, wo sowohl für de Kontakt zur Pfarrei als au zu de Eltere vo de Chind zueschtändig isch. Sie oder er verfüegt teilwiis über e chirchlichi Uusbildig und isch au für d Organisation vo religiöse Sache mit zueschtändig.

[ändere] Bundesleitig

Gmeinsam hät d Jubla in Luzern e Gschäftsschtell, d Bundesleitig. Nebed Verwaltigsuufgabe kümmeret si sich au um pädagogischi und pastorali Aaliege.

[ändere] Verbandsleitig

Di ehrenamtlichi gmeinsam Verbandsleitig vo Jungwacht und Blauring isch dr Vorschtand vo de beide Verbänd. Die Zämearbet isch uf Bundesebeni vertraglich greglet. Dur das isch es nöd nötig für beidi Verbänd trennt d Poschte z bsetze. Lediglich d Präsidium isch no gsonderet z wähle.

[ändere] Bundesversammlig

D Bundesversammlig isch s höchschte Jubla-Gremium. Si tritt zwei Mal jährlich uf Iiladig vo dr Verbandsleitig zäme. Delegierti us de einzelne Kantön schtimmed über Finanzfrage, Mitgliedschafte und anderi grundsätzlichi Sache ab.

[ändere] Mitglieder und Schare

Uf Bundesebeni händ Jungwacht und Blauring folgendi Mitglieder und Schare (D Zahle beziehnd sich uf d Jahr 2005):

Mitglieder 31'798 (2004: 32'178)
- devoo Buebe 9'453 (2004: 9'774)
- devoo Maitli 14'409 (2004: 14'588)
- devoo Leiter 7'936 (2004: 7'816)

Schare 496 (2004: 505)
- devoo Jungwacht-Schare 124 (2004: 136)
- devoo Blauring-Schare 187 (2004: 195)
- devoo Jubla-Schare 185 (2004: 174)

[ändere] Literatur

Niklaus Schmid: Jugendführer in Jugendgruppe und Freizeit. Eine sozialpsychologische Untersuchung über die Gruppenführer im Schweizerischen Jungwachtbund. Freiburg in der Schweiz 1968 [Dissertation zur Erlangung der Doktorwürde von der Philosophischen Fakultät der Universität Freiburg in der Schweiz]

[ändere] Weblinks

Dr Artikel basiert uf ´ra freie Ibersetzung vum Artikel „Jubla“ us dr dytsche Wikipedia. E Lischte mit de dörtige Autore kasch dörte aluege

Kategorie: Artikel uf Züritüütsch | Organisation