Rheinische Megalopole
Us der alemannische Wikipedia, der freie Dialäkt-Enzyklopedy
Dialäkt: Markgräflerisch (Ebringe) |
Die Rhinisch Megalopole isch e Chette vu Balligsrüme, wo sich im e etwa 50 bis 200 km breite Korridor entlang vum Rhi-Izugsbiit vum schwyzer Middelland bis zue dr Mündig in dr Niderlande erstrecke duet un demit ä dichti Asammlig vu große, infrastrukturell eng verflochtene, benochberte Metropole un Grossstädt- ä sognennti Megalopole - bildet.
Si isch d'Chernregion vu dr sognennte Blaue Banane, des isch e etwa 200 km breite, wie e Banane chrümmte dicht besidelte Striife in Europa, wo vu England yber s'Rhiizugsbiit bis in d'Lombardei reicht un einigi Siteäst het.
Die Rhinisch Megalopole isch eini vu dr wirtschaftliche Chernregione vu dr Erde, aber wirtschaftlich relativ heterogen. Mit ebbe 60 Millione Iwohner zellt si zue dr bevölchrigriichste un am dichteste besidelte Regione in Europa.
Folgendi Balligsrüm un Metropolregione liige (vu Nord-West nooch Süd-Ost) in dr Rhinische Megalopole:
- Lille
- Brüssel-Antwerpen
- Randstad Holland
- Rhi-Ruhr
- Rhi-Main
- Rhi-Neckar
- Stuttgart
- Charlsrue-Strossburg-Basel
- Züri