Shetlandpony
Us der alemannische Wikipedia, der freie Dialäkt-Enzyklopedy
S Shetlandpony ghört zo de chlinschte Ross of de Wäut ond chonnt ursprögnlech vo Grossbritannie, vo de Shetlandensle. Früecher send d Shettys ide Bärgwärk bruucht worde, das esch höt zom Glöck verbotte. I de hötige Zyt gseht mer die Pony vor allem aus Chenderriitpony ond Wagepony. S Stockmass darf ned höcher aus 1.07 m si.
Inhaltsverzeichnis |
[ändere] Gschecht
Die Rasse goht wahrschiindlech of d Waud- ond Tundreponys zrog, wo währet de Iiszyt gläbt hend. Drom sends ou so chli blobe. Spöter sends denn aus Arbetspony beliebt gse, do si sehr robust ond liecht z haute gse send ond mer si för fascht alles het chönne bruuche. Im Johr 1847 hett mer de d Arbet vo Froue ond Chend ide Bärgwärk verbotte ond velli Shettys hend mösse iröcke. Erscht afangs 20.Johrhondert hend d Shettys ehre donkli Arbetzplatz chönne verloh. S Stutbuech esch 1890 gröndet worde.
[ändere] Exterieur
S Shetty het e breite, edle Chopf met chline Ohre. Es het e chorze Rögge ond chorzi stämmigi Bei. Läng- ond Deckhoor send decht. Im Wenter chömmeds sehr vöu Fäll öber. Es chömmid alli Farbe vor, Tegerschägge wärded imene andere Stuetbuech gfüert.
[ändere] Interieur
Es fröntlechs, willensstarchs Pony. Es bruucht e feschti Hand om es Shetty uszböude. Wemmer weiss met Shettys omzgo ond si aus Ross respektiert, chammer os denne Ponys ächti "Spetzeross" mache. Es Shetty esch sehr intelligänt ond wemmer meint, mer chöig si zo öppisem zwenge, hettmer scho verlore. Mer darf die chline Ross of kei Fau onderschätze, sie send di stärchschte Ross of de Wäut.
[ändere] Zocht
Höt wärded Shettys ide ganze Wäut zöchtet, aber vor allem z Ängland ond z Holland.
[ändere] S Shetty im Sport
Emmermeh wärde si ou im Sport igsetzt. Hetmer vor no ned langer Zyt d Shettys fettlibig of Wîesene gseh, fendt mer si etz öfters of em Tornierplatz. Jedes Johr geds Shettyturnier, wo vom SVPS (Schwiizerische Verband för Ponys ond Chlipferd) organisiert wärded oder ou privati, wie bispöuswiis de Hasemoos-Sporttag in Schöpfheim. Diszipline wie Shettytrabrennen fahre chömmid emmer meh uf. Das fröit s Härz vom Shettyfrönd omso meh, z gse, dass mer sech för die chline, leischtigsbereite Ponys interessiert.
[ändere] Literatur
Shetlandponys, Dorothee Dahl:Cadmos Pferdebücher
Shetlandponys in Deutschland, Sandra Asmussen:Asmussen
[ändere] Links
http://www.shetlandponysspv.ch/ Schwiizerische Shetlandponyverband
http://www.ig-shetland.de/ Inträssegmeinschaft vo Shettyzöchter ond Liebhaber
