Tierkreiszeichen

Us der alemannische Wikipedia, der freie Dialäkt-Enzyklopedy

Dialäkt: Markgräflerisch (Ebringe)

Als Dierchreiszeiche (au Sternzeiche gnennt) bezeichnet mer 12 Abschnitt vu je 30 Grad uf dr Erdbahn um d'Sunne. Si sin dorum im Grund nit anders wie e antiquierte Bezeichnig fer die ekliptikal Längi vume Gstirn.

[ändere] Sachverhalt

D'Zellig vu dr Abschnitte fangt bi dem Punkt vu dr Erdbahn a, bi dem d'Erdax tangential zue dr Erdbahn stot un dr subsolar Punkt uf dr Erdchugle dr Erdäquator vu Süde nooch Norde yberschrittet (also dr Früehlingsafang uf dr Nordhalbchugle) und folgt no dr Bewegigsrichtig vu dr Erde um d'Sunne.

Ufgrund vu dr Ellipsebahn vu dr Erde um d'Sunne durwanderet d'Erde die einzelne Abschnitte underschidlich schnell. In Sunneferni (derzitt im Nordsummer/Südwinter) langsamer wie in Sunnenächi (derzitt im Nordwinter/Südsummer). Dorum sin die Abschnitt au underschidlich (zwische 29 un 32 Däg) lang.

Die in dr Nächi dr Erdbahnebeni (Ekliptik) im Sternehimmel glägene Regione nennt mer Dierchreis (im grichische Fachwort "Zodiak") un die 12 Abschnitte vu dr Erdbahn um d'Sunne nennt mer au Dierchreiszeiche. Dr Abschnitt mit dr ekliptikale Längi vu 0 bis 30° heisst bispilswiis Widder.

D'Dierchreiszeiche spile e zentrali Rolle in dr - je nooch Standpunkt - Para- oder Pseudowisseschaft Astrologi, wo e statistisch signifikante Zämmehang zwische vum vu dr Erde durloffene Erdbahnabschnitt bi dr Geburt vu eme Mensch behauptet un uf dere Grundlag Analyse - sognennti Horoskope erstellt. Es isch umsatzstarchi Branche wo devu läbt, allerdings isch e signifikante statistische Zämmehang zwische Läbenslauf un Erdbahnabschnitt bi dr Geburt vume Mensch nit noochgwiise.

D'Dierkreiszeiche sin nooch 12 vu dr 14 Dierchreisternbilder benennt, - also dene Sternbilder, dur die d'Ekliptik verlauft. D'Sternbilder "Schlangeträger" (Ophiuchus) un "Wal" (Cetus) hän cheini Pendants als Dierchreiszeiche. Während d'Sunne mehreri Wuche im Sternbild Schlangeträger z'sähe isch, isch si im Wal numme e baar Stund.

Vor ebba 2000 Johre isch d'Sunne, wenn d'Erde bispilswiis dur dr Bahnabschnitt mit em poetische Namme Widder gwanderet isch, im Sternbild Widder gstande, Säll isch hüt nümme dr Fall, wil in Folg vu dr Präzession vu dr Erdax dr Früehlingspunkt uf dr Erdbahn wanderet. Sit dr Festlegig vu dr Sternbildgrenze dur die International Astronomisch Union hän d'Sternbilder un Sternzeiche ohnehi numme no dr Namme gmeinsam.

[ändere] D'Erdbahnabschnitte als Dierchreis

Die bluemig daifte Segmente vu dr Erdbahn bilde als schinbari Sunnebahn d'Grundlag fer s'obendländisch Horoskop. Dr Durlauf durs jewilig Bahnsegment isch wäge dr Schaltjohre un sustige chleinere Effekte jedes Johr e chlei Wengili anderst. Massehoroskope dien säll in dr Regel nit berucksichtige. In dr folgende Tabelle sin d'Itrittswerte fers Johr 2006 agä, wobi uffgrund vu dr Zellig vum Früehligspunkt a dr Jänner un dr Februar erst am Schluss chumme.

Wichtig sin d'Itrittpunkte bi 0°, 90°, 180° un 270° als astronomischer Afang vu dr Johreszitte.

Ekliptiklängi	Itritt anno 2006	Symbol	alemannischer Namme	latinischer Namme
0° - 30°	20.03.2006, 18:26 h UTC (Nordfrüehlig)	♈	Widder	Aries
30° - 60°	20.04.2006, 06 h UTC	♉	Stier/Muni	Taurus
60°- 90°	21.05.2006, 04 h UTC	♊	Zwilling	Gemini
90° - 120°	21.06.2006, 12:26 h UTC (Nordsummer)	♋	Chräbbs	Cancer
120° - 150°	23.07.2006, 00 h UTC	♌	Laie	Leo
150° - 180°	23.08.2006, 08 h UTC	♍	Jungfrau	Virgo
180° - 210°	23.09.2006, 04:03 h UTC (Nordherbst)	♎	Woog	Libra
210° - 240°	23.10.2006, 14 h UTC	♏	Skorpion	Scorpio
240° - 270°	22.11.2006, 12 h UTC	♐	Schütze	Sagittarius
270° - 300°	22.12.2006, 00:22 h UTC (Nordwinter)	♑	Steibock	Capricornus
300° - 330°	20.01.2006, 06 h UTC	♒	Wasserma	Aquarius
330° - 360/0°	18.02.2006, 20 h UTC	♓	Fische	Pisces

[ändere] witteri Informatione

D'Erchlärig vu dr Dierchreiszeiche erfolgt do im e heliozentrische Bezugssystem. Dr dytsch Bitrag yber d'Dierkreiszeiche erchlärt degege geozentrisch.