Confraría relichiosa
De Biquipedia
Las confrarías, conflairías u cofadrías relichiosas son collas de laicos pa promober una creyenzia. Las confrarías relichiosas las diriche un gran mayestre, santo u gurú, e pueden estar:
- Confraría musulmana. Han estendillato á sobent bellas nozions preislamicas u cristianas en l'Islam, como por exemplo l'amor mistica de Dios u lo culto á los santos. Bellas escuelas de sufins se claman confrarías, como por exemplo los derbiches.
- Confraría catolica. Una confraría ye una asoziación de creyens catolicos que fan rolde arredol d'una abocación de Cristo, la Birchen u un santo, un inte de la pasión u una reliquia. Bi n'ha tres tipos:
- Confrarías penitenzials, que salen en Semana Santa. Son talment las més conoxitas en lo Baxo Aragón.
- Confrarías de Gloria, que salen la resta de l'año.
- Confrarías sacramentals, que tienen como tetular a lo Santismo Sacramento.
Totas las confrarías gosan organizar una prozesión, á lo menos una begata en una añata, solas u con atras confrarías.
L'organ plenario de la confraría ye lo capítol u asambleya cheneral de toz los conflaires. Lo capítol cheneral s'encarga d'esleir á la chunta, que ye l'organ de gubierno de la confraría, con un president.
Bellas confrarías tamién pueden aplegar-se en un organ superior que prene diferens nomes seguntes lo puesto: Consello cheneral, Capítol de Confrarías, Capítol superior, Federazión, Agrupazión, Unión, Chunta Local...
En las confrarías bi ha bellas clases de miembros, como los mayordomos, estans, costalers, omes de tron, cargadors, ezetra...
En prinzipio cualsiquier cristián puet formar parte d'una confraría, conseguindo la firma de bel chirmán que lo abale. Los nuebos miembros gosan rezibir la imbestidura de la tunica e la imposizión d'escapulario u medalla.
Una confraría important en la baxa Edat Meya zaragozana estió la Ermandat et Confrayría in honore de Sancte Marie de Transfixio (1311-1508), que escribió los suyos estatutos en aragonés. Atra confraría baxomeyebal que se'n conoxen los suyos estatutos en aragonés ye la de Confrairía de Santiago en Tudela, fundata en 1355 con l'aprobazión de Carlos de Nabarra.
La tradizión de confrarías catolicas baxomeyebals s'estendilló en las zonas d'America controlatas por Castiella e Portugal, e i estioron un elemento importantismo de la bida. En Brasil los negros formoron confrarías d'esclabos d'orichen africán, e asinas empezipió un sincretismo relichioso entre lo catolizismo e los cultos africanos, desembocando en los cultos afrocaribeños como lo Candomblé.
