Decretos de Nueba Planta
De Biquipedia
Os Decretos de Nueba Planta son o conchunto de decretos promulgaus por Felipe V d'España en a Guerra de Suzesión, entre 1707 y 1716, por os cuals se transformó a organizazión d'os territorios d'a Corona d'Aragón (Balenzia, Cataluña, Balears y Aragón).
A Corona d'Aragón refirmó a candidatura de l'archiduque Carlos d'Austria á o trono español, contra o candidato franzés Felipe de Borbón, refirmau por a Corona de Castiella. A derrota d'as tropas de l'archiduque en a batalla d'Almansa, o 25 d'abril de 1707, ubrió as puertas d'os reinos d'Aragón y Balenzia á l'exerzito d'os Borbons.
O 29 de chunio de 1707 s'emitió un decreto que suprimiba la organizazión politica d'Aragón y Balenzia pa implantar-sen as leis propias de Castiella, y se chustificaba a dezisión por a rebelión d'ixos reinos y o dreito de conquista. O decreto no aclariba brenca cómo s'eban d'organizar enta debán -o Decreto quereba castigar a os reinos rebeldes, y no pas creyar una nueba organizazión estatal-, y por ixo mientres seguiba la Guerra de Suzesión o caos politico y chudizial estió completo.
En 1711 s'emitió un segundo decreto que afectaba, más que más, á Aragón: s'organizó a nueba Audienzia de Zaragoza que gobernaría enta debán o reino, y sobre tot se reinstauró o dreito aragonés p'as relazions entre os aragoneses, que s'ha manteniu bibo dica l'actualidat.
Entre 1715 y 1716 se completó a Nueba Planta d'a Corona d'Aragón, con decretos parellanos que afectaban a Cataluña y Balears. En os dos casos, os Decretos de Nueba Planta yeran millor planificaus que en 1707, pero también mostroron espezial rigor con Cataluña, zentro d'a resistenzia austrazista. Se bedó l'uso ofizial d'o catalán, s'eliminoron as beguerías y se zarró a Unibersidat de Barzelona, encara que igual que en Aragón se conserbó o dreito zibil.
A consecuenzia d'istos decretos estió l'asimilazión forzada d'a Corona d'Aragón a las leis y costumbres de Castiella, y a fin d'as instituzions aragonesas, como as Corz, a Deputazión u o Chustizia. O dreito aragonés se mantenió, como o zaguer repui de l'antiga organizazión d'o reino. Por contra, istos decretos permitioron que os abitans d'a Corona d'Aragón podesen ir, por primer begada, enta America.
