Landa
De Biquipedia
- Ta atros empregos d'o termin Landa se beiga Landa (desambigazión).
Landa, Lanna, Laña u Lana ye una palabra d'orichen zelta que s'emplegó dica por lo menos 1796 en idioma aragonés.
En castellán de sustrato aragonés encara s'emplega con diferens sennificatos en Nabarra e Zinco Billas:
- En Artaxona, Jimeno Jurío documenta o sennificato de finca que no se cautiba.
- En a Ribera Nabarra, Irribaren documenta o sennificato de terreno estepario, arenoso, campo plano.
- En Azagra, sennifica estensión de terreno yermo.
- En Taust, sennifica parte baxa d'un campo, terreno a lo costato d'una zaica.
[editar] Toponimia
En a toponimia la trobamos á sobent en l'Alto Aragón, Nabarra e Ribera d'Ebro: Landa (Azagra, Alfacharín, Billafranca d'Ebro, Mallén, Grisén, Alcalá de Moncayo), Landas (Grañén, Lo Bust, Añón, Bal Tierra, Fontellas, Fustiñana, Taust, Pratiella, Alcalá d'Ebro, Cabañas d'Ebro, Alborche), Landilla (Alcalá d'Ebro), Landillas (Fuen de Xalón), Boca Rasa de las Landas (Cabañas d'Ebro), Landar (Los Fayos), Lanazas (Chaca), Lanas e Lana Mayor (Tramacastiella de Tena), Fuen de Landeta (Ansó, Fago).
[editar] Documentazión
A documentazión més antiga en fuens nabarras e aragonesas ye de 1102:
- concedo vobis quantum potueritis ibi laborare et examplare in illo ermo. Et confirmo una lanna quam vobis donavit ibi illo abbate don Eximino pr vineam facere.
A gran batalla contra los mezmuz en 1212 la claman Landas de Tolosa en a Cronica de San Chuan d'a Peña.
A zaguera documentazión d'o termin como bella cosa emplegata en o charrar bibo ye en Borau en l'año 1796, en unos manuscritos monezipals en castellán pero con aragonesismos:
- estatuimos ordenamos y mandamos que por quitar un abuso que abia en vender campos y lannas de unos vezinos a otros por lo cual el concello a recibido notables daños y por tanto se izo este estatuto, que ninguno puede vender campos ni lannas ninguna que deba al concello […]. Item ordenamos y mandamos que ninguno vecino de dicha villa no pueda vender ni logar campos ni lanas ni heredades de bienes sitios a ninguno que fuere eytranjero [sic] que no sea vecino de dicha villa
En diferens puntos d'Aragón s'han trobato deribatos de Lana como lañazo, llanazo, lanizo e lañón.
[editar] Etimolochía
En protozelta LANDA sennificaba probablement campo plan e con poca bechetazión, e ye corradical d'o latín PLANTA. Esta palabra esiste tamién en oczitán (espezialment en gascón) e basco.
En romanze nabarroaragonés, o grupo -ND- se conserbaba en Nabarra, (landa), pero eboluzionó ta -nn- cheminata (lanna) en bellas zonas de l'Alto Aragón (por exemplo en Bielsa, on se diz Barannato). Esta -nn- prenió dos camins diferens, u siguió lo destín d'a -NN- latina tornando-se -ñ- (laña), u se simplificó ta -n- (lana).
Iste articlo ye un borrador. Enamplando-lo aduyarás á amillorar a Biquipedia.
